Speeding Truck Kills 11 Pilgrims In Uttarakhand, 19 Others Hurt
భక్తులపైకి దూసుకెళ్లిన ట్రక్కు.. 11 మంది మృతి
దైవ దర్శనానికి వెళ్తున్న భక్తులను ట్రక్కు రూపంలో మృత్యువు కబళించింది. ఉత్తరాఖండ్లోని చంపావత్లో ఈ విషాదం జరిగింది. ప్రసిద్ధ పూర్ణగిరి ఆలయ సందర్శనకు వెళ్తున్న భక్తులపైకి అతివేగంగా దూసుకొచ్చిన ట్రక్కు 11 మంది పర్యాటకులను బలి తీసుకుంది.
Samayam Telugu18 May 2018, 7:42 pm
దైవ దర్శనానికి వెళ్తున్న భక్తులను ట్రక్కు రూపంలో మృత్యువు కబళించింది. ఉత్తరాఖండ్లోని చంపావత్లో ఈ విషాదం చోటుచేసుకుంది. ప్రసిద్ధ పూర్ణగిరి ఆలయ సందర్శనకు వెళ్తున్న భక్తులపైకి అతివేగంగా దూసుకొచ్చిన ట్రక్కు 11 మంది పర్యాటకులను బలి తీసుకుంది. కంకర లాంటివి తరలించే ఆ భారీ ట్రక్కు కింద నలిగి 9 మంది అక్కడికక్కడే మృతిచెందారు. మరో ఇద్దరు ఆస్పత్రిలో చికిత్స పొందుతూ ప్రాణాలు విడిచారు. ఈ ప్రమాదంలో మరో 19 మంది వరకూ తీవ్రంగా గాయపడ్డారు.
Samayam Telugu
మృతదేహాలన్నీ రోడ్డుపై చెల్లాచెదురుగా పడిపోయాయి. రహదారి అంతా రక్త ధారలతో భయానకంగా మారింది. చంపావత్ జిల్లాలోని తనక్పూర్ వద్ద శుక్రవారం (మే 18) ఉదయం ఈ ప్రమాదం చోటుచేసుకుంది. మృతులంతా యువకులు, మధ్య వయసువారే. ఉత్తరప్రదేశ్లోని బరేలి ప్రాంతానికి చెందిన వీరంతా తమ కుటుంబసభ్యులు, బంధువులతో కలిసి పూర్ణగిరి ఆలయ దర్శనానికి వచ్చారు. ఈ క్రమంలో అనూహ్యంగా మృత్యువాతపడటంతో వారి కుటుంబాల్లో తీవ్ర విషాదం నెలకొంది.
కొంపముంచిన కాలినడక.. ప్రమాదం జరిగిన సమయంలో భక్తులు పూర్ణగిరి ఆలయానికి 30 కి.మీ. దూరంలో ఉన్నారు. అమ్మవారిపై గౌరవ భావంతో, మొక్కులో భాగంగా వారంతా కాలినడకన పూర్ణగిరి క్షేత్రానికి వెళ్తున్నారు. ఇదే సమయంలో వేగంగా దూసుకొచ్చిన ట్రక్కు అదుపుతప్పి భక్తులపైకి దూసుకెళ్లింది.
మరణించిన వారిలో ఐదుగురు యువకులు, నలుగురు చిన్నారులు ఉన్నారు. మృతులను కమల్ (19), వీర్ సింగ్ (18), విశాల్ (17), కేశర్ సింగ్ (16), రామ్ కుమార్ (16), దీన్దయాల్ (35), బాబు (12), సోను (8), సోహన్ లాల్ (40), రామ్స్వరూప్ (40)గా గుర్తించారు. ఘటనపై పోలీసులు కేసు నమోదు చేసి దర్యాప్తు చేపట్టారు.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.