Sandeep Sharma Became The First Bowler To Dismiss Gayle, Kohli And Abd In The Same Match
ఒకే ఒక్కడు.. గేల్, కోహ్లి, ఏబీకి చుక్కలు చూపించాడు!
క్రిస్ గేల్, విరాట్ కోహ్లి, ఏబీ డివిలియర్స్.. ఈ పేర్లు వింటే క్రికెట్ బాల్ భయంతో వణికిపోతుంది.
TNN6 May 2017, 11:49 am
క్రిస్ గేల్, విరాట్ కోహ్లి, ఏబీ డివిలియర్స్.. ఈ పేర్లు వింటే క్రికెట్ బాల్ భయంతో వణికిపోతుంది. టి20 మ్యాచుల్లో వీళ్ల వీరబాదుడుని తట్టుకోలేక బంతి కన్నీరు మున్నీరవుతుంది. ఆ రేంజ్లో ఉంటుంది మరి వీళ్ల హిట్టింగ్. ఐపీఎల్లో రాయల్ ఛాలెంజర్స్ బెంగళూరు జట్టుకి వీళ్లే బలం, బలహీనత. అవును ఈ హిట్లర్లలో ఎవరో ఒకరు ఆడితేనే ఆ జట్టు భారీ స్కోరు సాధించగలుగుతోంది. ఈ ఐపీఎల్ సీజన్లో ఇప్పటి వరకు జరిగిన మ్యాచుల్లో ఆర్సీబీ ప్రదర్శన ఇలానే ఉంది. నిన్న రాత్రి పంజాబ్, బెంగళూరు మధ్య జరిగిన మ్యాచ్లోనూ ఇదే రిపీట్ అయింది.
గేల్ (0), కోహ్లి (6), ఏబీడీ (10) ఘోరంగా విఫలమవడంతో పంజాబ్ నిర్దేశించిన 138 పరుగుల స్వల్ప లక్ష్యాన్ని బెంగళూరు ఛేదించలేకపోయింది. పంజాబ్ బౌలర్లు చెలరేగిపోవడంతో 119 పరుగులకే బెంగళూరు చాపచుట్టేసింది. అయితే ఈ మ్యాచ్లో పంజాబ్ బౌలర్ సందీప్ శర్మ అరుదైన రికార్డు నమోదు చేశాడు. ఒకే మ్యాచ్లో ముగ్గురు దిగ్గజాలు క్రిస్ గేల్, విరాట్ కోహ్లి, ఏబీ డివిలియర్స్ను ఔట్ చేసిన ఏకైక బౌలర్గా రికార్డులకెక్కాడు. నిన్నటి మ్యాచ్లో అద్భుతంగా బౌలింగ్ చేసిన సందీప్.. నాలుగు ఓవర్లలో 22 పరుగులు మాత్రమే ఇచ్చి ఈ మూడు కీలక వికెట్లను పడగొట్టాడు. మిగిలిన పనిని అక్షర్ పటేల్ (3 వికెట్లు), మోహిత్ శర్మ (2 వికెట్లు) పూర్తి చేశారు. ఇన్నింగ్స్ తొలి ఓవర్లోనే క్రిస్ గేల్ను ఔట్ చేసిన సందీప్.. విజయవకాశాలపై పంజాబ్ శిబిరంలో ఆశలు రేపాడు. ఆఫ్ స్టంప్ మీదుగా సందీప్ వేసిన చక్కటి బంతిని ఫ్లిక్ చేసిన గేల్.. గుప్టిల్ చేతికి చిక్కాడు. ఆ తరవాత ఇన్నింగ్స్ మూడో ఓవర్లో విరాట్ కోహ్లిని సందీప్ క్లీన్ బౌల్డ్ చేశాడు. ఇక ఇన్నింగ్స్ ఐదో ఓవర్లలో ఏబీ డివిలియర్స్ను వికెట్ల వెనకాల దొరకబుచ్చుకున్నాడు. అంటే తాను వేసిన స్పెల్లోని వరుస ఓవర్లలో ఈ ముగ్గురు స్టార్ బ్యాట్స్మన్ను పెవిలియన్కు పంపాడు. మొత్తం మీద ఇప్పటి వరకు ఎవరికీ సాధ్యంకాని ఫీట్ను సందీప్ శర్మ చేసి చూపించాడు.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.