బెయిర్‌స్టో హాఫ్ సెంచరీ.. ఢిల్లీ టార్గెట్ 163

ఐపీఎల్ 2020 సీజన్‌లో వరుసగా మూడో మ్యాచ్‌లోనూ సన్‌రైజర్స్ హైదరాబాద్ బ్యాట్స్‌మెన్‌లు అంచనాల్ని అందుకోలేకపోయారు. ఢిల్లీ క్యాపిటల్స్‌తో అబుదాబి వేదికగా మంగళవారం రాత్రి జరుగుతున్న మ్యాచ్‌లో జానీ బెయిర్‌స్టో (53: 48 బంతుల్లో 2x4, 1x6) నెమ్మది హాఫ్ సెంచరీ నమోదు చేయడంతో 20 ఓవర్లలో సన్‌రైజర్స్ హైదరాబాద్ 4 వికెట్ల నష్టానికి 162 పరుగులే చేయగలిగింది. ఢిల్లీ బౌలర్లలో కగిసో రబాడ, అమిత్ మిశ్రా చెరో రెండు వికెట్లు పడగొట్టారు.


మ్యాచ్‌లో టాస్ గెలిచిన ఢిల్లీ క్యాపిటల్స్ కెప్టెన్ శ్రేయాస్ అయ్యర్ ఫీల్డింగ్ ఎంచుకోగా.. ఓపెనర్లు డేవిడ్ వార్నర్ (45: 33 బంతుల్లో 3x4, 2x6), జానీ బెయిర్‌స్టో.. సన్‌రైజర్స్ హైదరాబాద్‌‌ ఇన్నింగ్స్ ప్రారంభించారు. సాధారణంగా దూకుడుగా ఆడే ఈ జోడీ.. గత రెండు మ్యాచ్‌ల్లో మిడిలార్డర్‌ చేతులెత్తేయడంతో ఈ మ్యాచ్‌లో అతి జాగ్రత్తగా బ్యాటింగ్ చేసింది. ఈ క్రమంలో తొలి వికెట్‌కి 9.3 ఓవర్లలో 77 పరుగుల భాగస్వామ్యం నమోదవగా.. అమిత్ మిశ్రా బౌలింగ్‌లో రివర్స్ స్వీప్ షాట్ ఆడబోయి వార్నర్ ఔటయ్యాడు. అనంతరం వచ్చిన మనీశ్ పాండే (3: 5 బంతుల్లో) కూడా తక్కువ స్కోరుకే పెవిలియన్‌కి చేరిపోడంతో.. బెయిర్‌స్టో మరింత నెమ్మదించాడు. అయితే.. చివర్లో కేన్ విలియమ్సన్ (41: 26 బంతుల్లో 5x4), అబ్దుల్ సమాద్ (12 నాటౌట్: 7 బంతుల్లో 1x4, 1x6) దూకుడుగా ఆడటంతో హైదరాబాద్ 162 పరుగులైనా చేయగలిగింది.