రహదారి కోసం తవ్వితే, స్తంభాలు వెలుగులోకి.. భారీగా తరలివచ్చిన జనం

అనంతపురం జిల్లాలో రహదారి పనుల కోసం తవ్వుతుండగా.. ఆలయ స్తంభాలు బయటపడ్డాయి. చిలమత్తూరు మండలంలోని కొడికొండ చెక్‌పోస్ట్ నుంచి సిరా వరకు నిర్మిస్తున్న రోడ్డు పనుల్లో.. ఎస్సార్సీ కాంట్రాక్టర్లు తవ్వకాలు జరిపారు. ఈ తవ్వకాల్లో అక్కడ అతి పురాతన మైన దేవాలయ ఆనవాళ్లు కలిగిన స్తంభాలు బయటపడ్డాయి.

ఈ విషయం తెలుసుకున్న గ్రామస్తులు.. తండోపతండాలుగా అక్కడికి చేరుకున్నారు. ఇక్కడ దేవాలయం గతంలో ఉండేదని.. గ్రామ పెద్దలు తెలుపుతున్నారు. అయితే ఆలయ స్తంభాలను గుట్టుచప్పుడు కాకుండా వాటిపై మట్టిని కప్పే ప్రయత్నం చేశారు. స్థానికులు అడ్డుకోవడంతో అక్కడి నుంచి వెళ్లిపోయారు. పురావస్తు అధికారులు సంఘటన స్థలానికి చేరుకుని పరిశీలించారు. ఆలయ స్తంభాలు వెలుగులోకి రావడం స్థానికంగా చర్చనీయాంశంగా మారింది. దేవాలయ ప్రాముఖ్యత గురించి చర్చించుకుంటున్నారు. లేపాక్షి ఆలయ సమీపంలోనే రాతి స్తంభాలు బయటపడడంతో.. 16వ శతాబ్దానికి సంబంధించినవి అని స్థానికులు చెబుతున్నారు.