Uravakonda: రోడ్డు దుస్థితి చూసి మరమ్మతు చేసిన ఆటోడ్రైవర్లు

అధ్వాన్నంగా మారిన రోడ్డును ఎవరూ పట్టించుకోకపోవడంతో ఆటోడ్రైవర్లందరూ కలిసి మరమ్మతు చేశారు. సొంత ఖర్చులతో మరమ్మతు పనులు చేశారు. తమ ఆటోల్లో మట్టిని తీసుకొచ్చి, తామే స్వయంగా గుంతలు పూడ్చారు. అనంతపురం జిల్లా ఉరవకొండలో (Uravakonda auto drivers) ఈ ఘటన చోటుచేసుకుంది. ఉరవకొండ నుంచి నెరిమెట్లకు వెళ్లే 11 కి.మీ. మేర రహదారి బాగా దెబ్బతిన్నది. వాహనదారులు తీవ్ర ఇబ్బందులు పడుతున్నారు. గర్భిణులు, వృద్ధులు ఆ రోడ్డు మీదుగా ప్రయాణించాలంటే భయపడుతున్నారు.

రోడ్డు దుస్థితిని చూసి స్థానిక ఆటో డ్రైవర్స్ యూనియన్ మరమ్మతు పనులకు పూనుకుంది. ప్రయాణికులు, గర్భిణీలు పడే ఇబ్బందులు చూడలేకే తాము ఈ పనికి పూనుకున్నామని చెప్పారు. 10 ఏళ్లుగా ఈ రోడ్డు ఇలాగే ఉందని.. ఎవరూ పట్టించుకోవడంలేదని స్థానికులు ఆవేదన వ్యక్తం చేస్తున్నారు.