పెనుకొండ యువకుడికి బంపరాఫర్.. ఏకంగా రూ.1.7 కోట్ల ప్యాకేజ్‌తో ఉద్యోగం

ఓ యువకుడికి భారీ ప్యాకేజ్‌తో ఉద్యోగం దక్కింది. ఏకంగా ఏడాదికి రూ.1.7 కోట్లతో ఆఫర్ వచ్చింది. సత్యసాయి జిల్లా పెనుకొండ మండలం గొల్లపల్లికి చెందిన భార్గవ్‌కుమార్‌రెడ్డి అమెరికాలోని అరిజోనా యూనివర్సిటీలో ఎంఎస్ చేస్తున్నాడు. డిసెంబర్‌లో చదువు పూర్తికానుంది. ఇంతలోనే క్వాల్‌కాం కంపెనీ ముందే ఏడాదికి రూ. 1.7 కోట్లు ప్యాకేజీ ఆఫర్ చేసింది. తన ఎంఎస్ పూర్తికాగానే క్వాల్‌కాంలో చేరనున్నారు. క్వాల్‌కాంలో భార్గవ్‌కుమార్‌రెడ్డి అధునాతన చిప్‌ల తయారీపై పనిచేయనున్నారు.

అంతేకాదు భార్గవ్‌ చదువుతున్న అరిజోనా యూనివర్సిటీ కూడా ఇప్పటికే అతనికి రూ. 20 లక్షలు స్కాలర్‌ షిప్‌ ఇవ్వడం విశేషం. కుమారుడికి భారీ ప్యాకేజీతో ఉద్యోగం రావడంతో తల్లిదండ్రులు శ్రీనివాసరెడ్డి, అలివేలమ్మ ఆనందం వ్యక్తం చేశారు. తమ కుమారుడు ఏడాదికి రూ.కోటి సంపాదించే ఉద్యోగంలో చేరతాడని అసలు ఊహించలేదు అంటున్నారు. భార్గవ్ కష్టపడి చదివే మనస్తత్వమని.. తమ కుమారుడి ప్రతిభతో తెలుగు రాష్ట్రాలతో పాటూ తమిళనాడులో ఉన్న విద్యా సంస్థలు ఫీజుల్లో పెద్ద ఎత్తున రాయితీ కూడా ఇస్తామన్నారని గుర్తు చేశారు. భార్గవ్‌కుమార్‌రెడ్డి ఎంఎస్‌ పట్టా అందుకోకముందే రూ.కోట్లతో ఉద్యోగం దక్కింది.

• Read LatestAndhra Pradesh News and Telugu News