ఒక్కొక్కరూ కూలిపోయారు.. టైరు మీద నిల్చొని దూకేశా: కరెంట్ షాక్ నుంచి బయటపడ్డ మహిళ

శ్రీ సత్యసాయి జిల్లా తాడిమర్రి మండలం చిల్లకొండయ్యపల్లి వద్ద విద్యుత్ తీగ తెగి ఆటోపై పడిన దుర్ఘటనలో ఐదుగురు బుగ్గిపాలైన విషయం తెలిసిందే. ఈ ప్రమాదానికి ఓ ఉడత కారణమని విద్యుత్తు శాఖ అధికారులు తెలిపారు. ఈ ప్రమాదం నుంచి బయటపడిన ఓ మహిళ జరిగిన ఘటన గురించి వివరించారు. చెప్పులేసుకుని టైరు మీదే కూర్చున్నానని.. ఒక్కొక్కరూ పడిపోతుంటే కాళ్లు ముడుచుకునే దూకేశానని తెలిపారు. కళ్ల ముందే తన వాళ్లను కోల్పోయి కన్నీళ్లు పెట్టుకుంటున్నారు.


కరెంట్ స్తంభం పైకి ఉడత ఎక్కినప్పుడు ఇన్సులేటర్‌ నుంచి కండక్టర్‌కు షార్ట్‌ సర్క్యూట్‌ అయి మధ్యలో తీగ తెగిందని.. అదే సమయంలో అటుగా వస్తున్న ఆటోపై ఆ తీగ పడిందని ఎస్పీడీసీఎల్‌ అధికారులు వివరించారు. అయితే, తీగలు, బుడ్డీలు (ఇన్సులేటర్లు) నాసిరకంగా ఉండటం వల్లే ఈ ప్రమాదం జరిగిందని స్థానికులు ఆరోపిస్తున్నారు.

గ్రామ శివార్లలోని పొలాల్లో 6 నెలల కిందటే 11 కేవీ లైను ఏర్పాటు చేశారు. ఇందులో ఎల్టీ (లోటెన్షన్‌) తీగలు వాడారని స్థానికులు చెబుతున్నారు. పాత విద్యుత్ తీగలు లాగుతుండటంపై కాంట్రాక్టర్లను ప్రశ్నించినా.. వాళ్లు లెక్క చేయలేదని చెబుతున్నారు. నాసిరకం తీగలను మార్చాలని విద్యుత్తు అధికారులను కలిసి పలుమార్లు ఫిర్యాదు చేశామని.. అయినా, వాళ్లు పట్టించుకోలేదని ఆవేదన వ్యక్తం చేశారు.

ప్రమాదానికి ఉడుత కారణమని చెబుతున్న నేపథ్యంలో తాడిమర్రి పశు వైద్యశాలలో శుక్రవారం (జులై 1) ఉడుత కళేబరానికి డాక్టర్లు పరీక్షలు చేసినట్లు తెలుస్తోంది!