TDP కార్యకర్త ఇంటికి వెళ్లిన వైసీపీ ఎమ్మెల్యే.. తెలుగు తమ్ముడి రియాక్షన్తో కేతిరెడ్డి అవాక్కు
Kethireddy Venkatarami Reddy గుడ్ మార్నింగ్ ధర్మవరం కార్యక్రమంలో ఆసక్తికర సన్నివేశం. ఓ ఇంటిపై టీడీపీ జెండాను చూసిన ఎమ్మెల్యే. అక్కడ ఆసక్తికర సన్నివేశం కనిపించింది.
ప్రధానాంశాలు:
- గుడ్మార్నింగ్ ధర్మవరం కార్యక్రమంలో MLA
- ఇంటిపై టీడీపీ జెండా చూసి వెళ్లిన కేతిరెడ్డి
- అక్కడి తెలుగు తమ్ముడితో ఆసక్తికర సంభాషణ
శ్రీ సత్యసాయి జిల్లా ధర్మవరం ఎమ్మెల్యే (Dharmavaram Mla) కేతిరెడ్డి వెంకట్రామిరెడ్డి (Kethireddy Venkatarami Reddy) గురించి పరిచయం అక్కర్లేదు. గుడ్ మార్నింగ్ ధర్మవరం అంటూ ప్రతి రోజూ నియోజకవర్గంలో పర్యటిస్తారు. అలాగే ప్రజల సమస్యలపై ఆరా తీస్తూ పరిష్కరిస్తుంటారు. ఇప్పుడు గడప, గడపకు మన ప్రభుత్వం కార్యక్రమాన్ని కూడా నిర్వహిస్తున్న సంగతి తెలిసిందే. గుడ్ మార్నింగ్ ధర్మవరం, గడప గడపకు కార్యక్రమాల్లో భాగంగా.. నియోజకవర్గంలో పర్యటిస్తున్న కేతిరెడ్డి.. ఇంటింటికి వెళుతూ ప్రభుత్వం నుంచి ప్రజలకు అందిన పథకాలను వివరిస్తున్నారు. ఈ క్రమంలో ఎమ్మెల్యే కేతిరెడ్డి వెంకట్రామిరెడ్డి పర్యటనలో ఆసక్తికర ఘటన జరిగింది. ఆ వీడియో వైరల్ అవుతోంది. కేతిరెడ్డి ఓ గ్రామంలో పర్యటిస్తుండగా.. ఓ ఇంటిపై టీడీపీ జెండా కనిపించింది. ఎమ్మెల్యే ఏవయ్యా ఆ జెండా కడితిరే.. అది 'మన జెండా కాదే' అన్నారు. వెంటనే ఆ ఇంట్లో ఉన్న వ్యక్తి స్పందించి.. 'మా జెండా'నే అన్నారు. ఎమ్మెల్యే ఇదికో తీసుకో అని పేపర్ ఇవ్వబోయారు.. వెంటనే ఆ వ్యక్తి 'మీ పేపర్ వద్దు' అని సమాధానం ఇచ్చారు. వెంటనే స్పందించిన ఎమ్మెల్యే కేతిరెడ్డి ఏమయ్యా పథకాలు వద్దా అని ప్రశ్నించారు. వెంటనే తెలుగు తమ్ముడు.. 'మీ పథకాలు వద్దు ఏం వద్దు' అంటూ ఎమ్మెల్యేకు చెప్పారు. దీంతో ఎమ్మెల్యే నవ్వుకుంటూ అక్కడి నుంచి వెళ్లిపోయారు.
ఎమ్మెల్యే-టీడీపీ కార్యకర్త మధ్య జరిగిన సంభాషణకు సంబంధించిన వీడియోను తెలుగు తమ్ముళ్లు వైరల్ చేస్తున్నారు. నిజమైన పార్టీ కార్యకర్త ఇతనే అంటూ ప్రశంసిస్తున్నారు. ఇల్లు చూస్తే రేకులతో ఉందని.. కానీ పథకాలు వద్దంటూ ఎమ్మెల్యేకు చెప్పడం ఆశ్చర్యంగా ఉందంటూ వీడియోను ట్వీట్ చేశారు. ఈ వీడియో ఇప్పుడు వైరల్ అవుతోంది. ఈ సన్నివేశం ఎక్కడ జరిగిందో తెలియాల్సి ఉంది.