ప్రభుత్వ ఉద్యోగి వక్రబుద్ధి.. కాలేజీ అమ్మాయిలు, యువతులే లక్ష్యం.. షాకింగ్ విషయాలు

అతడో ప్రభుత్వ ఉద్యోగి.. కాలేజీ అమ్మాయిలు, యువతులే అతని లక్ష్యం.. తమ అవసరాలకు కోసం వచ్చిన వారిని తన 'అవసరాలు' తీర్చుకుని వాడుకుని వదిలేసేవాడు. గత కొన్నేళ్లుగా ఇదే పనిగా పెట్టుకున్న కామాంధుడిని అనంతపురం పోలీసులు అరెస్ట్ చేశారు.

అనంతపురం దిశ డీఎస్పీ శ్రీనివాసులు తెలిపిన వివరాల ప్రకారం.. కుంతురు మాధవరెడ్డి అనంతపురం నగర పాలకసంస్థలో వర్క్‌ ఇన్‌స్పెక్టర్‌‌గా పనిచేస్తున్నాడు. గత కొన్నేళ్లు ప్రభుత్వ కార్యాలయానికి వచ్చిన కాలేజీ అమ్మాయిలు, యువతులతో పరిచయం పెంచుకునేవాడు. వారి ఫోన్ నంబర్లు తీసుకుని.. తన నంబరు ఇచ్చేవాడు.

వారి అవసరాలను తెలుసుకుని వాటిని తీర్చుతూ.. తన అవసరాలకు వాడుకునే వాడు. లైంగికంగా వేధించడంతో పాటు.. శారీరకంగా వాడుకుని వదిలేయడమే మాధవరెడ్డి పని. అమ్మాయిలు, యువతులను మోసం చేయడమే కాకుండా.. బ్రోకర్‌గానూ అతను వ్యవహరించాడు. ఉద్యోగంలో ఇప్పటికే రెండుసార్లు సస్పెండ్ అయినా మాధవరెడ్డిలో మార్పు రాలేదు.

ఈ ఏడాది నవంబరులోనే మాధవరెడ్డి ఉద్యోగ విరమణ చేయాల్సి ఉంది. పది రోజుల కిందట కూడా ఓ యువతికి లిఫ్ట్ ఇస్తానని నమ్మబలికించాడు. ఆమెను శివారులోకి తీసుకెళ్లి.. అసభ్యంగా ప్రవర్తించాడు. ఆ తర్వాత ఆమె తన తల్లిదండ్రులతో కలిసి దిశ పోలీసులను ఆశ్రయించింది.

కేసు నమోదు చేసుకున్న దిశ పోలీసులు.. మాధవరెడ్డి అసలు గుట్టు బయటపెట్టారు. అనంతపురం నగర శివారులోని ప్రసన్నాయపల్లి రైల్వేగేటు సమీపంలో బుధవారం సాయంత్రం అతడిని అరెస్ట్ చేశారు. జిల్లా జడ్జి 15 రోజుల రిమాండ్‌ విధించారు. అతడి చేతిలో మోసపోయిన వారు ఎవరైనా ఉంటే.. తమకు ఫిర్యాదు చేయాలని దిశ డీఎస్పీ శ్రీనివాసులు తెలిపారు.