ఆకివీడులో అమానుషం, కరోనా అనుమానంతో ఇంటి నుంచి గెట్టివేత.. రాత్రంతా శ్మశానంలోనే..!

ఓ వైపు కరోనా వైరస్ మహమ్మారి ప్రపంచాన్ని వణికిస్తోంది. మనుషులు ఒకరికొకరు సాయం చేసుకోవాల్సిన క్లిష్ట పరిస్థితుల్లో ఉన్నాం. అలాంటి ఈ కష్టకాలంలో కొందరు అమానుషంగా ప్రవర్తిస్తున్నారు. కనీస మానవత్వం మరిచిపోయి దారుణంగా వ్యవహరిస్తున్నారు. ఇటీవలే నెల్లూరులో కరోనా సోకిన వారిని ఎదురింటి వ్యక్తి ఇంట్లో పెట్టి బయట తాళం వేసిన సంఘటనను మరువక ముందే.. ఆంధ్రప్రదేశ్ రాష్ట్రంలో మరో దారుణం చోటుచేసుకుంది.

పశ్చిమగోదావరి జిల్లా ఆకివీడులో ఇంట్లో అద్దెకు ఉంటున్న వీరమ్మ అనే వృద్ధురాలు, ఆమె కొడుకును కరోనా ఉందనే అనుమానంతో యజమానులు ఇంటి నుంచి బయటకు గెంటివేశారు. దీంతో స్థానికులు వారిని గ్రామంలోని ఓ క్రైస్తవ శ్మశానంలో వదిలిపెట్టారు. ఆ సమయంలో ఎక్కడికి వెళ్లాలో తెలియక.. తల్లీకొడుకు ఇద్దరూ రాత్రి అంతా శ్మశానంలోనే గడిపారు. ఈ విషయం చుట్టుపక్కల వారికి, తర్వాత గ్రామస్తులందరికీ తెలిసింది.

చివరకు, ఈ విషయం చివరకు పోలీసులకు చేరింది. వెంటనే గ్రామానికి చేరుకున్న పోలీసులు.. ఆ ఇంటి యాజమానిని హెచ్చరించారు. అనంతరం గ్రామస్తులకు కరోనాపై అవగాహన కల్పించారు. ఆ తర్వాత వీరమ్మ, అతని కుమారిడిని ఆటోలో అద్దె ఇంటికి తరలించారు. ఈ ఘటనపై పలువురు ఆగ్రహం వ్యక్తం చేస్తున్నారు.