గుంటూరు భార్యాభర్తలను కలిపిన జస్టిస్ ఎన్వీ రమణ.. సుప్రీం కోర్టులో అరుదైన కేసు, తెలుగులోనే స్వయంగా..!

ఎలాంటి సమస్యనైనా తీర్చొచ్చు గాని, భార్యాభర్తల మధ్య గొడవలు మాత్రం పరిష్కరించడం సాధ్యం కాదని పెద్దలు అంటుంటారు. అయితే, అలాంటివి కేవలం మూఢనమ్మకాలు మాత్రమే అని భారత ప్రధాన న్యాయమూర్తి జస్టిస్ ఎన్వీ రమణ నిరూపించారు. ఏకంగా సుప్రీం కోర్టులోనే భార్యాభర్తల సమస్యకు పరిష్కారం చూపించి, ఇద్దరినీ ఒక్కటి చేశారు. బుధవారం సుప్రీం కోర్టులో ఓ అరుదైన ఘట్టాన్ని ఆవిష్కరించారు. మనస్పర్థల కారణంగా గత 20 ఏళ్లుగా దూరంగా ఉంటున్న భార్యాభర్తలను ఒకటి చేశారు.

తన మాతృ భాష తెలుగులోనే వారి వాదలను విని మరీ భార్యాభర్తలను ఒప్పించి కలిసి ఉండాలని ఆశీర్వదించారు. గుంటూరు జిల్లా గురజాల డిప్యూటీ తహసీల్దార్‌గా పనిచేస్తున్న శ్రీనివాసశర్మ, శాంతిలకు 1998లో వివాహం జరిగింది. ఈ దంపతులకు 1999లో ఓ కుమారుడు జన్మించాడు. అయితే ఆ తర్వాత ఇంట్లో గొడవల కారణంగా 2001 నుంచి విడిపోయారు.

అయితే తనపై భర్త దాడి చేశారంటూ అప్పట్లో శాంతి పోలీసులను ఆశ్రయించారు. దీంతో శ్రీనివాసశర్మపై సెక్షన్ 498ఏ కింద కేసు నమోదు చేశారు. ఆ తర్వాత గుంటూరులోని 6వ అడిషనల్ మున్సిప్ మెజిస్టేట్ కోర్టు శ్రీనివాసశర్మకు ఏడాది జైలు శిక్ష, రూ.1,000 ఫైన్ విధించింది. అయితే శ్రీనివాసశర్మ హైకోర్టును ఆశ్రయించడంతో 2010 అక్టోబర్ 6న శిక్ష తగ్గిస్తూ హైకోర్టు ఆదేశాలను జారీ చేసింది. హైకోర్టు తీర్పును శాంతి సుప్రీం కోర్టులో 2011లో సవాల్ చేశారు. దీంతో ఈ కేసుపై సీజేఐ జస్టిస్ ఎన్వీ రమణ బుధవారం ఆన్‌లైన్‌లో విచారించారు. భార్యభర్తలకు సవివరంగా సర్దిచెప్పి, భార్యాభర్తలను కలిపారు.

ప్రత్యేకత చాటిన జస్టిస్ ఎన్వీ రమణ
నిజానికి, సుప్రీం కోర్టు స్థాయిలో వాది, ప్రతివాదులను కోర్టుకు పిలవరు. వారి తరఫు న్యాయవాదులే వాదిస్తుంటారు. అయితే, ఇక్కడే జస్టిస్ ఎన్వీ రమణ తన ప్రత్యేకతను చాటుకున్నారు. సుదీర్ఘ కాలంగా దూరంగా ఉన్న భార్యాభర్తల మనోగతాన్ని స్వయంగా వారితో మాట్లాడి తెలుసుకునే ప్రయత్నం చేశారు. అంతేకాకుండా వారిద్దరూ కలిసి జీవితంలో ముందుకు సాగేలా వారికి నచ్చజెప్పారు. బాధితులు తెలుగులో వారి మనోవేదనలను తెలిపారు. ఇక, ఈ విచారణను సహచర న్యాయమూర్తి జస్టిస్ సూర్యకాంతకు జస్టిస్ ఎన్వీ రమణ ఇంగ్లిష్‌లో ట్రాన్స్‌లేట్ చేసి వివరించడం హైలెట్‌గా చెప్పుకోవచ్చు.