Palnadu: పల్నాడు జిల్లా మాచవరంలో.. 'కేజీఎఫ్‌' స్టైల్ మైనింగ్‌!

Palnadu: పల్నాడు జిల్లాలో కేజీఎఫ్‌ సినిమా పేరు మారుమోగుతోంది. మాచవరం మండలం రేగులగడ్డ సమీపంలోని అటవీ ప్రాంతంలో.. కేజీఎఫ్ (KGF) తరహా అక్రమ తవ్వకాలు కనిపిస్తున్నాయని.. టీడీపీ నేత యరపతినేని శ్రీనివాసరావు ఆరోపించారు. గురజాల ఎమ్మెల్యే కాసు మహేష్‌రెడ్డి ఆధ్వర్యంలో ఇదంతా జరుగుతోందని సంచలన వ్యాఖ్యలు చేశారు. విలేకరులతో కలిసి యరపతినేని శ్రీనివాసరావు కృష్ణా నది మీదుగా నాటు పడవల ద్వారా మైనింగ్‌ ప్రాంతానికి వెళ్లారు. అక్కడి పరిస్థితులను మీడియాకు చూపించారు. ఈ సందర్భంగా కీలక వ్యాఖ్యలు చేశారు. 'గురజాల నియోజకవర్గంలో దాదాపు 35 చోట్ల ఎమ్మెల్యే కాసు మహేష్‌రెడ్డి (Kasu Mahesh Reddy) ఆధ్వర్యంలో వైసీపీ నాయకులు అక్రమ మైనింగ్‌కు పాల్పడుతున్నారు. పులిచింతల ప్రాజెక్టు నిర్మాణంతో ముంపునకు గురైన రేగులగడ్డ సమీపాన అటవీ ప్రాంతం.. కృష్ణా నది మధ్యన సుమారు 30 ఎకరాల్లో మైనింగ్‌ జరుగుతోంది. దీనికి ఎవరు అనుమతిచ్చారు. రెవెన్యూ, పోలీసు, విజిలెన్సు, జలవనరులశాఖ, మైనింగ్‌ అధికారులు సమాధానం చెప్పాలి' అని యరపతినేని శ్రీనివాసరావు డిమాండ్ చేశారు.

'ఇక్కడ పనులు చేసేందుకు కూలీలను నాటు పడవల ద్వారా చేరవేస్తున్నారు. వారి ప్రాణాలకు ప్రమాదమని తెలిసినా నిర్లక్ష్యం వహిస్తున్నారు. అక్రమాలు చేస్తూ కొందరు వేల కోట్లు సంపాదిస్తున్నారు. ఇలాంటి వారిని నియోజకవర్గం నుంచి తరిమికొట్టాలి. నియోజకవర్గంలో మైనింగ్‌ కోసం తవ్విన గుంతల్లో పడి ఎనిమిది మంది చిన్నారులు చనిపోయారు' అని యరపతినేని శ్రీనివాసరావు (Yarapathineni Srinivasa Rao) వ్యాఖ్యానించారు.

• Read Latest Andhra Pradesh News and Telugu News