మంగళగిరిలో టీడీపీకి ఎదురు దెబ్బ.. పార్టీ సీనియర్ నేత రాజీనామా, సంచలన వ్యాఖ్యలు

నారా లోకేష్ (Nara Lokesh) ప్రాతినిధ్యం వహిస్తున్న గుంటూరు జిల్లా మంగళగిరి నియోజకవర్గంలో టీడీపీ (TDP)కి ఎదురు దెబ్బ తగిలింది. మంగళగిరిలో కీలక నేత గంజి చిరంజీవి (Ganji Chiranjeevi) పార్టీకి రాజీనామా చేశారు. తెలుగుదేశం పార్టీ బీసీల పార్టీ అని జాయిన్ అయ్యానని.. నేతి బీరకాయలో నెయ్యి ఉండదనేది ఎంత నిజమో తెలుగుదేశం పార్టీలో బీసీలకు చోటు ఉండదనేది అంతే నిజమన్నారు. పార్టీ కోసం అహర్నిశలు పని చేశానని.. పార్టీలో కొంతమంది నాయకులు తనను రాజకీయంగా హత్య చేశారన్నారు. అందుకే పార్టీ నుంచి తప్పుకుంటున్నట్లు ప్రకటించారు. టీడీపీ (TDP) అధికార ప్రతినిధి పదవికి, పార్టీ సభ్యతనికి రాజీనామా చేస్తున్నట్లు చిరంజీవి తెలిపారు. తెలుగుదేశం పార్టీ బీసీల పార్టీ అని చెప్పుకుంటారని.. కాని మంగళగిరి నియోజకవర్గం చేనేతలకు సంబంధించిన నియోజకవర్గం అన్నారు. ఆ ఒక్క సీటు కూడా లాగేసుకున్నారు మాకు ద్రోహం చేశారని.. లోకేష్ కోసమే ఒక పథకం ప్రకారం బీసీ సామాజికవర్గానికి చెందిన తనను పక్కకు నెట్టారన్నారు. పార్టీని తాను మోసం చేస్తే.. తాను నమ్ముకున్న దేవుడు తనను నాశనం చేస్తాడన్నారు. తెలుగుదేశం పార్టీ తనను మోసం చేస్తే అదే దేవుడు తెలుగుదేశం పార్టీని నాశనం చేస్తారన్నారు. 2019 చివరి వరకు సీటు నీదే అని సీట్లు ఇవ్వకుండా తీవ్రంగా అవమానించారన్నారు.

టీడీపీలో మున్సిపల్ చైర్మన్‌గా, 2014లో ఎమ్మెల్యే అభ్యర్ధిగా అవకాశం కల్పించినందుకు ధన్యవాదాలు తెలియజేశారు. పార్టీలో బీసీగా ఉన్న తనను రాజకీయంగా ఇబ్బంది పెట్టారని.. 2014లో తన ఓటమికి సొంత పార్టీ నేతలే కారణమని సంచలన వ్యాఖ్యలు చేశారు. పదవులు కోసం, పరపతి కోసం టీడీపీకి రాజీనామా చేయడం లేదని.. సొంత పార్టీ నేతల వెన్నుపోట్లు భరించలేక రాజీనామా చేస్తున్నట్లు
ప్రకటించారు.

టీడీపీ వాళ్ళే తన రాజకీయ జీవితం నాశనం చేశారని.. మంగళగిరి ఎమ్మెల్యే సీటు తనదే అని చెప్పి మోసం చేశారన్నారు. టీడీపీ రాష్ట్ర అధికార ప్రతినిధి అనే పదవి ఇచ్చి.. మంగళగిరి ప్రజలకు దూరం చేశారన్నారు. చేనేత, బీసీగా ఉన్న తనను అణగదొక్కారని.. తన ఆవేదన బాధ నేతలకు తెలిసినా పట్టించుకోలేదన్నారు. ఎస్టీ, బీసీలకు న్యాయం చేసేవారితోనే నడుస్తానని.. అందరిని సంప్రదించి త్వరలో నిర్ణయం తీసుకుంటాను అన్నారు. గంజి చిరంజీవి (Ganji Chiranjeevi) మంగళగిరి నియోజకవర్గంలో కీలక నేతగా ఉన్నారు. 2014లో మంగళగిరి నుంచి పోటీ చేసి ఓడిపోయారు.. ఆ తర్వాత మున్సిపల్ ఛైర్‌పర్సన్‌గా పనిచేశారు. నారా లోకేష్ 2019లో మంగళగిరి నియోజకవర్గం ఎంచుకోవడంతో గంజి చిరంజీవికి సీటు దక్కలేదు.. అయినా అప్పటి నుంచి పార్టీలో కొనసాగుతున్నారు. లోకేష్‌కు అనుచరుడిగా ఉన్నారు.