పోలీస్‌ స్టేషన్‌ వచ్చిన టీడీపీ నేత బ్రహ్మారెడ్డి.. మాచర్లలో హై అలర్ట్‌!

పల్నాడు జిల్లా మాచర్ల టౌన్‌ పోలీస్‌ స్టేషన్‌లో నియోజకవర్గ తెలుగు దేశం పార్టీ ఇన్‌ఛార్జి జూలకంటి బ్రహ్మారెడ్డి హాజరయ్యారు. గుంటూరు నుంచి ఓ ప్రైవేటు బస్సులో బ్రహ్మారెడ్డితో పాటు మరో 22 మంది టీడీపీ నాయకులు మాచర్ల చేరుకున్నారు. పోలీస్ స్టేషన్‌లో సంతకాలు చేసిన నేతలు అదే బస్సులో గుంటూరుకు బయల్దేరి వెళ్లారు. ఎలాంటి అవాంఛనీయ సంఘటనలు జరగకుండా ముందస్తుగా మాచర్ల పట్టణంలో భారీగా పోలీసు బలగాలు మోహరించాయి.

బ్రహ్మారెడ్డిని చూసేందుకు టీడీపీ కార్యకర్తలు పెద్ద ఎత్తున మాచర్ల చేరుకోవడంతో టెన్షన్ వాతావరణం నెలకొంది. దీంతో మీడియాను పోలీసు స్టేషన్‌ వద్దకు అనుమతించలేదు. అలాగే, మాచర్ల పట్టణంలో 144 సెక్షన్‌ ఉందంటూ పోలీసులు హడావుడి చేశారు. దీంతో మాచర్లలో ఉదయం నుంచి హై అలర్ట్‌ నెలకొంది. బ్రహ్మారెడ్డితో పాటు అందరూ పోలీస్‌ స్టేషన్‌లో సంతకాలు పెట్టి వెళ్లిపోవడంతో పాటు.. ఎలాంటి అవాంఛనీయ ఘటనలు జరగకపోవడంతో పోలీసులు ఊపిరి పీల్చుకున్నారు.