టిఫిన్ తెద్దామని బయటకెళ్లిన భర్త.. ఇంటికి తిరిగొచ్చి చూడగానే, పండగపూట మాటలకు అందని విషాదం!

బాపట్ల జిల్లా చీరాలలో దారుణం జరిగింది. పట్టణంలో సోమవారం రాత్రి మహిళ దారుణ హత్య కలకలంరేపింది. నేరెళ్లవారి వీధిలో ఊట్ల మదనగోపాలమూర్తి, విజయలక్ష్మి దంపతులు నివాసం ఉంటున్నారు. వీరి కుమారుడు బెంగళూరులో సాఫ్ట్‌వేర్‌ ఉద్యోగం చేస్తూ అక్కడే ఉంటున్నాడు. సోమవారం సాయంత్రం 6.30 గంటల సమయంలో భర్త టిఫిన్‌ తెచ్చేందుకు బయటకు వెళ్లాడు. దాదాపు 45 నిమిషాల తర్వాత ఇంటికి వచ్చాడు. ఇంతలో ఓ దుండగుడు ఇంటిలో నుంచి బయటకు పరుగులు తీస్తూ కనిపించాడు. గోపాలమూర్తి భయంతో ఇంట్లోకి వెళ్లి చూడగా రక్తపు మడుగులో భార్య విగతజీవిగా పడి ఉంది. వెంటనే వన్‌టౌన్‌ పోలీసులకు సమాచారం ఇవ్వగా.. వారు సంఘటనా స్థలానికి చేరుకుని పరిశీలించారు. క్లూస్‌ టీం ద్వారా ఆధారాలు సేకరిస్తున్నారు. సీసీ కెమెరాల ఆధారంగా నీలి రంగు లుంగీ, తెలుపు రంగు చొక్కాతో నిందితుడు పరారవుతున్నట్లు పోలీసులు గుర్తించారు. ఆ దుండగుడు మహిళను హతమార్చి బంగారు ఆభరణాలతో పరారైనట్లు తేల్చారు. సీసీ ఫుటేజ్ ఆధారంగా పోలీసులు దర్యాప్తు చేస్తున్నారు.