నన్ను బహిరంగంగా ఉరితీయండి: వైఎస్ విజయమ్మకు బీజేపీ నేత కౌంటర్

ముఖ్యమంత్రి వైఎస్ జగన్మోహన్ రెడ్డి బాబాయ్, మాజీ మంత్రి వైఎస్ వివేకానందరెడ్డి హత్య కేసులో తన ప్రమేయం ఉంటే బహిరంగంగా ఉరి తీయాలని బీజేపీ నేత, మాజీ మంత్రి ఆదినారాయణరెడ్డి తేల్చి చెప్పారు. ఈ మేరకు మంగళవారం ఆదినారాయణరెడ్డి మీడియాతో మాట్లాడుతూ.. తనపై వైఎస్ విజయమ్మ చేసిన ఆరోపణలు పూర్తిగా అవాస్తవమని స్పష్టం చేశారు. వైఎస్ వివేకా కుమార్తె డాక్టర్ సునీత ప్రెస్మీట్ పెట్టి మరీ న్యాయం కోరారంటే దోషులు ఎవరో ప్రజలకు అర్థమైందన్నారు. రాజకీయ లబ్ధి కోసమే విజయమ్మ లేఖ రాశారని ఆయన అభిప్రాయపడ్డారు. వైఎస్ వివేకానందరెడ్డి హత్య విషయమై సీబీఐ విచారణను జగన్ ప్రభుత్వం ఎందుకు కోరుకోవడం లేదో ప్రజలకు సమాధానం చెప్పాలని ఆదినారాయణ రెడ్డి డిమాండ్ చేశారు.
కాగా, 2019 మార్చిలో తన ఇంట్లోనే వైఎస్ వివేకానందరెడ్డి దారుణ హత్యకు గురైన విషయం తెలిసిందే. ఈ కేసును ప్రస్తుతం సీబీఐ విచారిస్తోంది. ఈ హత్య జరిగి రెండేళ్లు దాటినా కూడ ఇంతవరకు నిందితులు ఎవరో గుర్తించకపోవడంపై వివేకానందరెడ్డి కూతురు డాక్టర్ సునీత ఆవేదన వ్యక్తం చేశారు. ఈ నెల 2వ తేదీన న్యూఢిల్లీలో ఆమె సీబీఐ అధికారులను కలిసిన తర్వాత మీడియాతో మాట్లాడారు. రెండేళ్లు దాటినా కూడ దోషులను పట్టుకోకపోవడంపై ఆమె అసంతృప్తి వ్యక్తం చేశారు.

నా మరిది వైఎస్ వివేకాను చంపింది ఎవరో తేల్చాల్సిందే.. విజయమ్మ సంచలన లేఖ
ఈ తరుణంలో ముఖ్యమంత్రి వైఎస్ జగన్మోహన్ రెడ్డిని టార్గెట్ చేస్తూ, ఇటీవల మీడియాలో వార్తలు వెలువడిన తరుణంలో ఆదివారం రాత్రి ఆయన తల్లి విజయమ్మ 5 పేజీల లేఖ మీడియాకు విడుదల చేశారు. అందులో, తన మరిది వైఎస్ వివేకా హత్య జరిగినది చంద్రబాబు హయాంలో అని, హత్య తర్వాత రెండున్ననర నెలలు చంద్రబాబే ముఖ్యమంత్రిగా ఉన్నారని గుర్తు చేశారు. ఈ హత్యకు సంబంధించి చంద్రబాబు మంత్రి, పార్టీ ఫిరాయించిన ఆదినారాయణ రెడ్డి పాత్ర మీద అనేక అనుమానాలున్నాయని ఆరోపించారు. ఆయన ఇప్పుడు బీజేపీలో ఉన్నారని.. ఆదినారాయణరెడ్డి తిరుపతిలో స్టేజీ మీద పెట్టుకున్న పవన్‌ కల్యాణ్, దర్యాప్తు సీబీఐ చేతిలో... అంటే కేంద్ర ప్రభుత్వం చేతిలో ఉందని తెలిసీ జగన్‌ మీద విమర్శలు చేయడం సరికాదన్నారు. ఈ తరుణంలో వివేకా హత్య కేసులో తన పాత్ర ఉంటే ఉరి తీయమని ఆదినారాయణరెడ్డి వ్యాఖ్యానించడం గమనార్హం.