రాత్రి లేటుగా ఇంటికొచ్చిన భార్య.. అడిగినందుకు.. కడపలో దారుణం

భార్య బ్యూటీ పార్లర్‌లో పనిచేయడం భర్తకి నచ్చలేదు. అక్కడికి వెళ్లొద్దని గొడవపడేవాడు. అందుకు ఆమె నిరాకరించడంతో అనుమానం పెంచుకున్నాడు. తరచూ గొడవలు జరుగుతున్నాయి. రాత్రివేళ ఆలస్యంగా ఇంటికి రావడంతో భార్యాభర్తల నడుమ ఘర్షణ జరిగింది. భర్త కొడుతున్నాడని కత్తితో పొడిచేసింది. మర్మాంగాలకు బలంగా తగలడంతో భర్త అక్కడికక్కడే కుప్పకూలిపోయాడు. ఈ దారుణ ఘటన కడపలో జరిగింది.

నగరంలోని అక్కాయపల్లె శాస్త్రి నగర్‌కి చెందిన వల్లూరు సుబ్బరాయుడు, నారాయణమ్మ దంపతుల రెండో కుమారుడు కిరణ్‌కుమార్‌కి కలసపాడు మండలం ముదిరెడ్డిపల్లెకి చెందిన తులసి(28)తో 11 ఏళ్ల కిందట వివాహమైంది. కొద్దికాలం నుంచి భార్య తులసి బిల్డప్ సమీపంలోని లోహియానగర్‌ ఏరియాలో బ్యూటీపార్లర్ నిర్వహిస్తోంది. బ్యూటీపార్లర్‌లో పనిచేయడం ఇష్టం లేని భర్త తరచూ గొడవపడేవాడు. దీంతో ఇద్దరి మధ్య తరచూ గొడవలు జరుగుతున్నాయి.

ఇటీవల మనస్పర్థల కారణంగా భార్యాభర్తలు నాలుగు నెలలు వేర్వేరుగా ఉన్నారు. పెద్ద మనుషులు పంచాయతీ చేయడంతో మళ్లీ కలిశారు. లోహియానగర్‌లోనే ఇల్లు అద్దెకు తీసుకుని ఉంటున్నారు. బ్యూటీపార్లర్‌కి వెళ్లొద్దని చెప్పినా ఆమె వినకపోవడంతో అనుమానం పెంచుకున్నాడు. ఇద్దరి మధ్య మళ్లీ గొడవలు మొదలయ్యాయి. భార్య వివాహేతర సంబంధం పెట్టుకుందన్న అనుమానంతో గొడవపడేవాడు.

రెండు రోజుల కిందట భార్య రాత్రి ఇంటికి లేటుగా రావడంతో ఇద్దరి మధ్య ఘర్షణ చోటుచేసుకుంది. భర్త ఆమెను కొట్టేందుకు యత్నించడంతో పక్కనే ఉన్న కత్తి తీసుకుని పొడిచేసింది. పొత్తికడుపు కింద భాగంలో మర్మాంగాలపై బలంగా తగలడంతో రక్తపు మడుగులో అక్కడికక్కడే కుప్పకూలిపోయాడు. వెంటనే కిరణ్ తల్లికి విషయం తెలియజేశారు. స్థానికులు 108కి ఫోన్ చేయడంతో సిబ్బంది వచ్చి పరీక్షించారు. అప్పటికే కిరణ్ మృతి చెందినట్లు చెప్పారు. తల్లి నారాయణమ్మ ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. క్షణికావేశంలో జరిగిన తప్పుకి పిల్లలు తండ్రిని కోల్పోయారు. తల్లి జైలుపాలవడం స్థానికులను కలచివేసింది.

Also Read: