పులివెందులలో కాల్పుల కలకలం.. భరత్‌ యాదవ్‌కు అందుకే గన్‌ లైసెన్స్ మంజూరు చేశామన్న ఎస్పీ!

వైఎస్సార్ జిల్లా పులివెందులలో కాల్పుల ఘటన ప్రదేశాన్ని మంగళవారం ఎస్పీ అన్బురాజన్‌ పరిశీలించారు. కాల్పులు జరిపిన భరత్ కుమార్ యాదవ్ తమ అదుపులో ఉన్నాడని ఎస్పీ అన్బురాజన్‌ వెల్లడించారు. భరత్ యాదవ్, దిలీప్‌ల మధ్య ఆర్థిక లావాదేవీలే ఈ కాల్పులకు కారణమని ఎస్పీ వివరించారు. భరత్‌ యాదవ్‌పై కేసు నమోదు చేసి అన్ని కోణాల్లో విచారణ జరుపుతున్నామని పేర్కొన్నారు.

భరత్ యాదవ్‌కు తుపాకీ ఎలా వచ్చిందనే దానిపై ఎస్పీ అన్బురాజన్ వివరణ ఇచ్చారు. మాజీ మంత్రి వైఎస్ వివేకానందరెడ్డి హత్య కేసు నేపథ్యంలో తనకు ప్రాణహాని ఉందని సీబీఐ డైరెక్టర్‌, కోర్టులను భరత్‌ యాదవ్ ఆశ్రయించాడని ఎస్పీ తెలిపారు. అందుకే భరత్‌కు గన్‌ లైసెన్స్ మంజూరు చేయాల్సి వచ్చిందని ఎస్పీ వివరించారు.

కాగా, ముఖ్యమంత్రి వైఎస్ జగన్మోహన్ రెడ్డి ప్రాతినిథ్యం వహిస్తున్న పులివెందులలో పట్టపగలే తుపాకీ కాల్పులు తీవ్ర కలకలం రేపిన విషయం తెలిసిందే. భరత్‌ కుమార్‌ యాదవ్‌ అనే వ్యక్తి తన తుపాకీ తీసుకొని ఇద్దరు వ్యక్తులపై నిర్దాక్షిణ్యంగా కాల్పులకు తెగబడ్డాడు. ఈ ఘటనలో తీవ్ర గాయాలైన దిలీప్‌ను కడప రిమ్స్‌కు తరలిస్తుండగా మార్గ మధ్యంలోనే మృతి చెందాడు. మహబూబ్‌ బాషా అనే వ్యక్తి పులివెందులలోని ప్రాంతీయ ఆసుపత్రిలో చికిత్స పొందుతున్నాడు.

కాగా, ఈ కాల్పులు జరిపిన భరత్ కుమార్ యాదవ్.. వైఎస్ వివేకానందరెడ్డి హత్య కేసులో నిందితుడు సునీల్ యాదవ్‌కు బంధువు. వివేకా హత్య కేసులో భరత్ యాదవ్‌ను కూడా సీబీఐ అధికారులు ప్రశ్నించారు. ఈ క్రమంలో కోర్టులను ఆశ్రయించి పోలీసుల నుంచి లైసెన్డ్స్ తుపాకీ తీసుకున్నారు. ఓ వైపు వివేకా హత్య కేసు ఎటూ తేలకముందే.. పులివెందులలో కాల్పులు జరగడం వైఎస్సార్ కడప జిల్లాలో హాట్ టాపిక్‌గా మారింది.