వైభవంగా మల్లన్న మహాశివరాత్రి బ్రహ్మోత్సవాలు.. భారీగా తరలివచ్చిన భక్తులు

కర్నూలు జిల్లా శ్రీశైలంలో మహాశివరాత్రి బ్రహ్మోత్సవాలు మొదటి రోజు వైభవంగా సాగాయి. బ్రహ్మోత్సవాలకు శాస్త్రోక్తంగా యాగశాల ప్రవేశం చేసి ఆలయ ఈవో లవన్న ఘనంగా ప్రారంభించారు. అర్చకులు వేదపండితులు యాగశాలలో శాస్త్రోక్తంగా ప్రత్యేక పూజలు నిర్వహించారు. గణపతి పూజ, శివసంకల్పం, చండీశ్వరపూజ, కంకణాధారణ, అఖండ దీపారాధన, వాస్తు పూజ, వాస్తు హోమం వివిధ విశేష పూజలు నిర్వహించి మహాశివరాత్రి బ్రహ్మోత్సవాలకు వైభవంగా ప్రారంభించారు.

సాయంత్రం అంకురార్పణ, అగ్నిప్రతిష్ఠాపన పూజలు చేసిన అనంతరం మహాశివరాత్రి బ్రహ్మోత్సవాలకు సకల దేవతలను ఆహ్వానిస్తూ ధ్వజారోహణ ధ్వజపట ఆవిష్కరణ బలిహరణలు మొదలగు పూజలు నిర్వహించారు. ఇక బ్రహ్మోత్సవాలలో భాగంగా శ్రీకాళహస్తి దేవస్థానం తరుపున స్వామి అమ్మవారికి పట్టువస్త్రాలు సమర్పించారు. శ్రీకాళహస్తి దేవస్థానం ఈవో పెద్దిరాజు దంపతులు స్వామి అమ్మవార్లకు పట్టు వస్త్రాలు సమర్పించారు. బ్రహ్మోత్సవాలను వీక్షించేందుకు భక్తులు భారీగా తరలివచ్చారు.