వరద నీటిలో కళ్యాణ మండపం.. ఐడియా అదిరింది.. పెళ్లి ఘనంగా జరిగింది!

ట్రాక్టర్‌లో జనాలు ఫంక్షన్ హాల్‌కు వెళ్తున్నారేంటి అనుకుంటున్నారా..? వీళ్లెవరో వరద బాధితులు అనుకుంటే పొరబాటే.. వీరంతా పెళ్లికి హాజరవుతున్నారు. నంద్యాలలో శనివారం రాత్రి భారీ వర్షం కురవడంతో... కళ్యాణ మండపం ప్రాంగణమంతా జలమయమైంది. దీంతో ట్రాక్టర్ల సాయంతో అతిథులను ఇలా తరలించారు.

నంద్యాల పట్టణంలో ఉన్న తిరుమల తిరుపతి దేవస్థానం వారి కల్యాణ మండపంలో ఈశ్వర్-పద్మావతిల పెళ్లి వేడుక జరిగింది. ఇందుకోసం శనివారమే అన్ని ఏర్పాట్లు పూర్తి చేశారు. కానీ రాత్రి కురిసిన వర్షానికి తెల్లారి చూసే సరికి కల్యాణ మండపం చుట్టూ వర్షపు నీరు చేరి చెరువును తలపించింది.

ఎన్ని ఆటంకాలు వచ్చిన సరే పెళ్లి ఆగకూడదు, పెళ్లికి వచ్చే వారు వెనక్కి పోకూడదని అనుకున్నారు, వెంటనే స్థానికంగా ఉన్న రెండు ట్రాక్టర్లను రప్పించి పెళ్లికి వచ్చే వారిని మండపం వద్ద దించడం, పెళ్లికి హాజరైన వారిని క్షేమంగా కల్యాణ మండపం నుంచి రోడ్డు పైకి తరలించడం చకచకా జరిగిపోయాయి.