ఇదీ ఈ క్యారెక్టర్‌ లేని ఆర్టిస్టు గారి పరిస్థితి.. పవన్‌పై వైసీపీ ఎమ్మెల్యే కామెంట్స్

జనసేన అధ్యక్షుడు పవన్ కళ్యాణ్ స్క్రిప్ట్ టీడీపీ కార్యాలయంలో తయారవుతుందని నంద్యాల ఎమ్మెల్యే శిల్పా ర‌విచంద్ర కిశోర్‌రెడ్డి అన్నారు. టీడీపీ స్క్రీన్‌ప్లే, కథ, దర్శకత్వం ప్రకారం చంద్రబాబు ఆనే నిర్మాతకు అనుకూలంగా నటించడాన్ని పవన్ రాజకీయం అని పేరు పెట్టుకున్నారని ఎద్దేవా చేశారు. పవన్ కళ్యాణ్ చేస్తోంది కౌలు రైతు భరోసా యాత్ర కాదని.. చంద్రబాబు భ‌రోసా యాత్ర అని విమర్శించారు. సొంత పుత్రుడు లోకేశ్‌ మీద నమ్మకం లేక.. దత్తపుత్రుడు పవన్ కళ్యాణ్‌ను రమ్మంటున్నారని అన్నారు.

'పవన్‌ కళ్యాణ్‌తో పొత్తులో ఉన్నామని బీజేపీ అనుకుంటోంది. కానీ పవన్ కళ్యాణ్ టీడీపీతో మళ్లీ ఎలా కలిసిపోవాలా అని అనుకుంటున్నాడు. ఇదీ ఈ క్యారెక్టర్‌ లేని ఆర్టిస్టుగారి పరిస్థితి..! అప్పుడే బీజేపీని వదిలేయటానికి రెడీ అయ్యాడు. రియల్‌ లైఫ్‌లో అయినా.. పొలిటికల్‌ లైఫ్‌లో అయినా ఒకే పద్ధతి. ఇతని కంటే ఘనుడు, వెన్నుపోటు, వంచనల నిపుణుడు చంద్రబాబు..' అని ఎమ్మెల్యే శిల్పా సెటైర్లు వేశారు. వైఎస్సార్సీపీ ప్రభుత్వం రైతులకు అందించిన సాయం.. గతంలో ఏనాడూ ఏ ప్రభుత్వం అందివ్వలేదన్నారు.

గతంలో రైతు ఆత్మహత్యలకు కారణమైన చంద్రబాబు-పవన్ మళ్లీ ఇప్పుడు కలిసి పోవడానికి సాకులు వెతుకుంటున్నారని ఆయన అన్నారు. రైతులకు ద్రోహం చేసిన ప్రభుత్వంలో పార్ట్‌నర్‌ మొసలి కన్నీరు కార్చటం ఏమిటి..? అని ప్రశ్నించారు. చంద్రబాబు హయాంలో మరణించిన 450 మందికి పైగా రైతులకు కూడా పరిహారం తమ ప్రభుత్వమే పరిహారం ఇచ్చిందని గుర్తుచేశారు. కార్లు మార్చినట్లు పవన్ కళ్యాణ్ నలుగురు పెళ్లాలను మార్చారని అన్నారు.