ఒక్క ఛాన్స్ ఇస్తే రోడ్డు మీదికి తీసుకొచ్చావ్.. 2024లో మా సత్తా చూపిస్తాం: జగన్‌కు నిరుద్యోగుల ఝలక్

ఒక్క ఛాన్స్ అడిగినందుకు ఓట్లేసి గెలిపిస్తే జగనన్న తమను రోడ్లపైకి వచ్చేలా చేశాడని నిరుద్యోగులు ఆవేదన వ్యక్తం చేస్తున్నారు. ఆంధ్రప్రదేశ్‌లో ప్రభుత్వం విడుదల చేసిన జాబ్ క్యాలెండర్‌కు నిరసనగా రాష్ట్రవ్యాప్తంగా అన్ని జిల్లా కేంద్రాల్లో విద్యార్థి, నిరుద్యోగ సంఘాలు సోమవారం ఆందోళన చేపట్టారు. ప్రస్తుతం ఈ జాబ్ క్యాలెండర్‌ను రద్దు చేసి తాజాగా మరో క్యాలెండర్‌ను విడుదల చేయాలని డిమాండ్ చేశారు.

Also Read: ఏపీ కొత్త గవర్నర్‌గా యడియూరప్ప.. అసమ్మతి నేతల ఎత్తుగడేనా!

ఈ నేపథ్యంలోనే డీవైఎఫ్ఐ ఆధ్వర్యంలో కర్నూలు కలెక్టరేట్‌ను ముట్టడించిన యువత.. జగన్ సర్కారుపై తీవ్రస్థాయిలో విరుచుకుపడ్డారు. పాదయాత్ర సమయంలో ఏటా వేల సంఖ్యలో ఉద్యోగాలు కల్పిస్తానని చెప్పిన వైఎస్ జగన్.. అధికారంలోకి వచ్చాక నిరుద్యోగలు పొట్టకొట్టేందుకు ప్రయత్నిస్తున్నారని మండిపడ్డారు. మాట తప్పం.. మడమ తిప్పం.. అంటూ ప్రగల్భాలు పలికే జగన్ ప్రభుత్వోద్యోగాల విషయంలో మాట తప్పారని ఎద్దేవా చేశారు. ఇలాగే మాట తప్పుకుంటూ వెళ్తే వచ్చే ఎన్నికల్లో వైసీపీకి ఒక్క ఓటు కూడా పడదని హెచ్చరించారు.

పాదయాత్ర సమయంలో 2.30లక్షల ఉద్యోగాలు కల్పిస్తామని హామీ ఇచ్చిన జగన్ ఇప్పుడు 10వేల ఉద్యోగాలకు మాత్రమే జాబ్ క్యాలెండర్ విడుదల చేయడం ఏంటని నిరుద్యోగులు నిలదీస్తున్నారు. ప్రభుత్వ ఉద్యోగాల విషయంలో మాట తప్పిన జగన్ ముఖ్యమంత్రి పదవికి రాజీనామా చేయాలని డిమాండ్ చేశారు. ఒక్క ఛాన్స్ అని అడిగిన జగన్‌కు ఓటేసినందుకు చెప్పుతో తమను తాము కొట్టుకోవాలనిపిస్తోందని కొందరు నిరుద్యోగులు తీవ్ర ఆవేదన వ్యక్తం చేశారు. జగన్ సర్కారు తీరు ఇలాగే ఉంటే 2024లో వైసీపీ పతనం కావడం ఖాయమని నిరుద్యోగులు హెచ్చరిస్తున్నారు.