గుండెపోటుతో కుప్పకూలిన 7వ తరగతి విద్యార్థిని.. వింజమూరులో విషాదం

శ్రీపొట్టి శ్రీరాములు నెల్లూరు జిల్లా వింజమూరు బాలుర ఉన్నత పాఠశాలలో తీవ్ర విషాద ఘటన చోటుచేసుకుంది. ఏడో తరగతి విద్యార్థినికి హఠాత్తుగా గుండెపోటు రావడంతో తరగతి గదిలోనే మృతి చెందింది. ఏం జరిగిందంటే.. వింజమూరు బాలుర ఉన్నత పాఠశాలలో ఏడో తరగతి చదువుతున్న ఎస్ సాజిదా (13).. తరగతి గదిలో ఉపాధ్యాయుడు బోధన చేస్తున్న సమయంలో ప్రశ్నలు అడగగా ఒకటి రెండు క్యూస్షన్లకు సమాధానం చెప్పింది. తర్వాత ఒక్కసారిగా కను గుడ్లు తేలేస్తూ అకస్మాత్తుగా కింద పడిపోయింది.

ఒక్కసారిగా జరిగిన ఈ సంఘటనను చూసిన ఉపాధ్యాయులు ఆందోళనతో విద్యార్థినికి ఫిట్స్ వచ్చాయనుకొని తాళపు చెవులు చేతులో పెట్టి.. నీటితో మొహం కడిగారు. అనంతరం, హుటాహుటిన స్థానిక ప్రైవేటు వైద్యశాలకు తరలించారు. అయితే, పరీక్షించిన వైద్యులు అప్పటికే పాప మృతి చెందినట్లు ధ్రువీకరించారు. దీంతో బీసీ కాలనీలో విషాదఛాయలు అలుముకున్నాయి.