తెలుగు ప్రజలకు శుభవార్త.. ఇంటి వద్దకే ఆనందయ్య మందు.. చకచకా ఏర్పాట్లు!

నెల్లూరు జిల్లా కృష్ణపట్నంలో ఆనందయ్య ఔషధం పంపిణీకి ఏపీ ప్రభుత్వంతో హైకోర్టు సైతం గ్రీన్‌సిగ్నల్ ఇవ్వడంతో మందు తయారీకి ఏర్పాట్లు ముమ్మరంగా సాగుతున్నాయి. తెలుగు ప్రజలకు మందు అందించేందుకు చకచకా ఏర్పాట్లు చేస్తున్నారు. వనమూలికలు, ముడిపదార్థాల సేకరణలో ఆనందయ్య యుద్ధప్రాతిపదికన పని చేస్తున్నారు.

ఔషధం తయారీకి ఏర్పాట్లు చేసుకోవాలని అధికారులు సూచించడంతో మందు పంపిణీపై ప్రకటన చేసే వరకు ఎవరూ కృష్ణపట్నం గ్రామానికి రావొద్దని ఆనందయ్య విజ్ఞప్తి చేశారు. మందు పంపిణీలో తొలి ప్రాధాన్యత నెల్లూరు జిల్లా సర్వేపల్లి నియోజకవర్గానికేనని ఆనందయ్య తేల్చి చెప్పారు. ఇక, మందు పంపిణీ సమయాల్లో కోవిడ్‌ నిబంధనలు పాటించాలన్నారు.

ఇదిలా ఉండగా, మంగళవారం మధ్యాహ్నం ఆనందయ్యతో నెల్లూరు జిల్లా కలెక్టర్ చక్రధర్‌బాబు మందు పంపిణీకి సంబంధించి సమావేశం నిర్వహించారు. అనంతరం కలెక్టర్ చక్రధర్‌బాబు మాట్లాడుతూ.. హైకోర్టు ఆదేశాల మేరకు ఆనందయ్య మందు పంపిణీకి చర్యలు తీసుకుంటున్నట్లు వెల్లడించారు. కరోనా పాజిటివ్ రోగులకిచ్చే మందు పంపిణీకి మొదట ప్రాధాన్యం ఇస్తామని చెప్పారు. త్వరలో ఆన్‌లైన్ ద్వారా ఆనందయ్య మందు పంపిణీకి చర్యలు తీసుకుంటున్నట్లు ప్రకటించారు. అంటే ఆనందయ్య మందు ఇంటి వద్దకే అందుబాటులోకి రానుంది. డోర్ డెలివరీ ద్వారా ఆనందయ్య మందు పొందవచ్చు.

ఇక, ముడిసరుకు సమీకరించి, నాలుగైదు రోజుల్లో పంపిణీ ప్రారంభిస్తామని కలెక్టర్ వెల్లడించారు. ఆన్‌లైన్ విధానం ద్వారానే మందు పంపిణీ జరుగుతుందని, నేరుగా ఇతర ప్రాంతాల వారు ఎవరూ మందు కోసం రావొద్దని అధికారులు సూచించారు. అవసరమైన ప్రాంతాలకు తామే మందు పంపిణీ చేస్తామని వెల్లడించారు. కంట్లో వేసే మందుపై ఇంకా నివేదికలు రావాల్సిన ఉన్నందున.. కోర్టు తీర్పు, ప్రభుత్వ మార్గదర్శకాల ప్రకారం చర్యలు చేపడతామని చెప్పారు. కాబట్టి, జిల్లాతో పాటు ఇతర ప్రాంతాల నుంచి మందు కోసం ఎవరూ రావొద్దని చక్రధర్‌బాబు విజ్ఞప్తి చేశారు. ఇక, ఇప్పటికే కృష్ణపట్నం పంచాయతీ పరిధిలో 144 సెక్షన్‌ను అమలు చేస్తున్నారు.