చేపల కోసం వల వేశాడు.. బయటకు తీస్తే షాకింగ్..!

చేపల కోసం ఓ జాలరి వల విసిరాడు. తాడు లాగితే బరువుగా అనిపించింది. భారీ చేప చిక్కిందోమోనని సంబరపడిపోయాడు. అయితే వల బయటకు లాగితే షాక్‌కు గురయ్యాడు. భారీ చేప పడింది అనుకుంటే.. వలలో నుంచి భారీ కొండ చిలువ దర్శనమిచ్చింది. ఈ ఘటన నెల్లూరు జిల్లాలో చోటు చేసుకుంది.

నెల్లూరు జిల్లాలో భారీగా వర్షలు కురుస్తున్న సంగతి తెలిసిందే. వాగులు, వంకలు పొంగిపొర్లడంతో సోమశిల జలాశయానికి నీరు భారీగా చేరింది. జలాశయం నుంచి నీటిని కిందికి వదలడంతో పెన్నానది జోరుగా ప్రవహిస్తోంది. దీంతో సంగం వద్ద మత్స్యకారులు హుషారుగా చేపలు పడుతున్నారు. ఈ క్రమంలోనే ఓ జాలరి చేపల కోసం నీటిలోకి వల విసిరాడు. అయితే అందులో నుంచి భారీ కొండ చిలువ బయటకు దర్శనమిచ్చింది.

కొండ చిలువ పొడవు దాదాపు 7 అడుగులు ఉంటుంది. దాన్ని చూసిన మత్స్యకారులు ఒక్కసారిగా హడలిపోయి.. అక్కడి నుంచి పరుగులు తీశారు. అయితే అది వలలో చిక్కుకుపోవడంతో బయటకు రాలేకపోయింది. భారీ కొండ చిలువను చూసేందుకు ప్రజలు పెద్ద ఎత్తున అక్కడికి చేరుకున్నారు. అనంతరం మత్స్యకారులు అందరూ కలిసి జాగ్రత్తగా వలను పట్టుకుని.. కొండ చిలువను అడవిలో వదిలేశారు.