తూ.గో: కొంపముంచిన యువనేత బర్త్ డే సెలబ్రేషన్స్.. 10మందికి కరోనా

తూర్పుగోదావరి జిల్లాలో కరోనా కల్లోలం సృష్టిస్తోంది. నాలుగు రోజులుగా 500కుపైగా కేసులు నమోదవుతూనే ఉన్నాయి. అయితే ఇటీవల ఓ యువనాయకుడి బర్త్ డే వేడుక దెబ్బకు పదిమంది వైరస్ బారినపడ్డారు. తూర్పు గోదావరి జిల్లా కొత్తపేట నియోజకవర్గ పరిధిలోని రావులపాలెంకు చెందిన ఓ యువనేత బర్త్ డే వేడుకలు నిర్వహించారు. ఈ వేడుకకు స్థానిక కార్యకర్తలు హాజరయ్యారు. అందరూ కలిసి పార్టీ కూడా చేసుకున్నట్లు తెలుస్తోంది.

ఈ వేడుకల తర్వాత కరోనా లక్షణాలు కనిపించడంతో కొందరు టెస్టులు చేయించుకోవడంతో పాజిటివ్ తేలింది. ఆ వెంటనే ఈ వేడుకలకు వెళ్లినవారంతో పరీక్షలు చేయించుకున్నారట.. వారిలో పదిమందికి వైరస్ సోకినట్లు తేలింది. పార్టీకి చెందిన యువనేత పుట్టిన రోజు వేడుకల్లో పలువురు కీలక నేతలు, ప్రజా ప్రతినిధులు కూడా పొల్గొన్నట్లు తెలుస్తోంది. దీంతో ఆ సెలబ్రేషన్స్‌కు వెళ్లినవారిలో కలవరం మొదలైంది.

ర్యాపిడ్ టెస్టు కిట్స్ తీసుకొచ్చి వేడుకల్లో పాల్గొన్న అందరికీ కరోనా పరీక్షలు నిర్వహిస్తున్నారట. అయితే ఊబలంక నుండి కొందరు తిరుమలకి పాదయాత్రగా వెళ్లారు. వారికి దర్శనం చేయించేందుకు ఒక నేత అక్కడకి వెళ్లి వచ్చారు. వచ్చాక ఈ బర్త్ డే వేడుకల్లో పాల్గొన్నారు. తర్వాత ఆయనకు ఆయన గన్ మెన్ కు కరోనా పాజిటివ్ అని తేలింది. సదరు నేత ద్వారానే ఈ కరోనా సోకినట్టు భావిస్తున్నారు.