తూర్పు గోదావరిలో మరో 5 కరోనా కేసులు, ఒక్కరి ద్వారా..

తూర్పు గోదావరి జిల్లాలో శుక్రవారం ఒక్క రోజే మరో ఐదుగురికి కరోనా వైరస్ (కోవిడ్ 19) పాజిటివ్‌ కేసులు నమోదయ్యాయి. దీంతో జిల్లాలో మొత్తం కేసుల సంఖ్య 17కి చేరింది. జిల్లాలోని కత్తిపూడిలో ఈ 5 కేసులు నమోదైనట్లు పెద్దాపురం ఆర్డీవో మల్లిబాబు ప్రకటించారు. కరోనా వైరస్‌ నిర్ధారణ అయిన ఐదుగురిని కాకినాడ ప్రభుత్వాసుపత్రిలోని ఐసోలేషన్‌ వార్డులో ఉంచి చికిత్స అందిస్తున్నట్లు ఆర్డీవో తెలిపారు.

తూర్పు గోదావరి జిల్లా పెద్దాపురం డివిజన్‌ శంఖవరం మండలం కత్తిపూడి గ్రామంలో ఇటీవలే ఓ వ్యక్తికి కరోనా పాజిటివ్‌గా నిర్ధారణ అయింది. దీంతో ఆ వ్యక్తితో సంబంధం ఉన్న 30 మంది నుంచి నమూనాలు సేకరించి పరీక్షలు నిర్వహించారు. వారిలో ఐదుగురికి కరోనా ఉన్నట్లు నిర్ధారణ అయిందని ఆర్డీవో వెల్లడించారు.

ఒక్కసారిగా ఐదు కొత్త కేసులు నమోదు కావడంతో చుట్టుపక్కల ప్రజలు ఆందోళన చెందుతున్నారు. ఈ నేపథ్యంలో ప్రజలంతా అప్రమత్తంగా ఉండాలని.. అత్యవసరమైతే తప్ప బయటకు రావద్దని ఆర్డీవో ప్రజలకు సూచించారు. అంతేకాకుండా కత్తిపూడి, పరిసర ప్రాంతాల్లో ఎవరికైనా కరోనా లక్షణాలు ఉన్నట్లు గుర్తిస్తే వెంటనే ఆరోగ్య శాఖ సిబ్బందికి తెలియజేయాలన్నారు.