రాజ్యాంగం ప్రకారమే చేస్తున్నారా.. జగన్ సర్కారుకు హైకోర్టు ప్రశ్నలు

ప్రభుత్వ, ప్రైవేటు ఉద్యోగాల్లో స్థానికులకు 75 శాతం రిజర్వేషన్లు కల్పిస్తూ ఆంధ్రప్రదేశ్‌ ప్రభుత్వం గతంలో జారీ చేసిన ఉత్తర్వులను ఓ న్యాయవాది హైకోర్టులో సవాల్ చేశారు. ప్రభుత్వం తీసుకున్న ఈ నిర్ణయానికి ఉన్న చట్టబద్ధత లేదంటూ విజయవాడకు చెందిన న్యాయవాది సీహెచ్‌. వరలక్ష్మి హైకోర్టులో రిట్‌ పిటిషన్‌ దాఖలు చేశారు. ఈ పిటిషన్‌ను విచారణకు స్వీకరించిన ఉన్నత న్యాయస్థానం దీనిపై నెల రోజుల్లో సమాధానం ఇవ్వాలని జగన్ సర్కారును ఆదేశించింది. పిటిషనర్‌ తరఫున సుప్రీం కోర్టు సీనియర్‌ న్యాయవాది బి.ఆదినారాయణరావు వాదనలు వినిపించారు.

ఈ అంశంపై వైసీపీ ప్రభుత్వం తరఫున ప్రభుత్వ న్యాయవాది సుమంత్‌ రెడ్డి వాదనలు వినిపించారు. ఉద్యోగ అవకాశాలు కల్పించే పారిశ్రామికవేత్తలు ఎవరైనా దీనిపై పిటిషన్‌ దాఖలు చేసే అవకాశం ఉంటుంది తప్ప న్యాయవాదులు, ఇతరులకు అవకాశం లేదని కోర్టుకు తెలిపారు. ఈ అంశంలో ప్రజాప్రయోజనం కూడా ఇమిడి ఉందని అభిప్రాయపడిన ధర్మాసనం పిటిషన్‌ను విచారణకు స్వీకరించింది.

స్థానికులకు 75 శాతం ఉద్యోగాలు కల్పించాలని రాజ్యాంగానికి లోబడే ఈ నిర్ణయం తీసుకుందా? దీనికి ఉన్న చట్టబద్ధత ఏంటని రాష్ట్ర ప్రభుత్వాన్ని హైకోర్టు ధర్మాసనం ప్రశ్నించింది. దీంతో కౌంటర్‌ దాఖలు చేసేందుకు కొంత సమయం కావాలని ప్రభుత్వ తరఫు న్యాయవాది కోరగా.. సానుకూలంగా స్పందించిన ధర్మాసనం నెల రోజుల్లో సమాధానం ఇవ్వాలని ఆదేశించింది.