ఏపీ వైద్యుల ఘనత.. షుగర్, బీపీ ఉన్నా కరోనాను జయించిన 65 ఏళ్ల వృద్ధుడు

కరోనా వైరస్ (కోవిడ్ 19) మహమ్మారిని ఎదుర్కొని ఏ వ్యక్తి బయటపడ్డాడు. మామూలుగా చూస్తే ఇందులో పెద్ద విశేషమేం లేదు.. ఎందుకంటే కరోనా వచ్చిన వాళ్లలో 95 శాతం మంది కోలుకున్నారు. కానీ, వృద్ధులు, పిల్లలు మాత్రం దీని వల్ల తీవ్ర పరిణామాలు ఎదుర్కొంటున్నారు. అయితే ఆంధ్రప్రదేశ్‌లో వైద్యులు అద్భుతం సృష్టించారు. కరోనా మహమ్మారి నుంచి 65 ఏళ్ల వృద్ధుడిని బయటపడేశారు. అదీ బీపీ, షుగర్ ఉన్న ఈ వృద్ధుడు కరోనాను జయించేలా చేశారు.

సౌదీ అరేబియాలోని మక్కా వెళ్లి వచ్చిన వృద్ధుడు (65) ఈ నెల 17న కరోనా లక్షణాలతో విశాఖపట్నంలోని టీబీసీడీ ఆస్పత్రిలో చేరారు. దీంతో ఆయనకు పరీక్షలు నిర్వహించగా కోవిడ్ 19 పాజిటివ్‌గా తేలింది. ఇంతలోనే బాధితుడికి బీపీ, షుగర్ కూడా ఉన్నట్లు తెలిసింది. దీంతో ఈ కేసును సవాల్‌గా తీసుకున్న డాక్టర్లు చికిత్స ప్రారంభించారు. ఆస్పత్రి డాక్టర్లు విజయ్ కుమార్, అయ్యప్ప, విజయ్ బాబు, స్టాఫ్ నర్సులు, పారామెడికల్ సిబ్బంది సమిష్టిగా కరోనా బాధితుడికి చికిత్స అందించారు.

Also Read: ఏపీలో మరో రెండు కరోనా కేసులు, మొత్తం 21.. ఆ ఎమ్మెల్యే ఫ్యామిలీ సేఫ్

వీరికి సదరు బాధితుడు కూడా సహకరించారు. దీంతో కొద్ది రోజుల్లోనే వృద్ధుడు సాధారణ స్థితికి చేరుకున్నారు. అనంతరం శనివారం, ఆదివారం ఆయనకు కోవిడ్ 19 పరీక్షలు చేయగా, రెండు సార్లు నెగిటివ్ రిపోర్టులు వచ్చాయి. కాగా, రాష్ట్రంలో ఆదివారం రాత్రికి 21 కరోనా పాజిటివ్ కేసులు నమోదు కాగా, ఇద్దరు కోలుకున్నట్లు వైద్యులు ప్రకటించారు. ఇద్దరిలో ఈ వృద్ధుడు కూడా ఒకరు. రాష్ట్రంలో ఇప్పటి వరకు విశాఖపట్నంలో 6 కరోనా కేసులు, గుంటూరు, కృష్ణా జిల్లాల్లో నాలుగు కేసుల చొప్పున, ప్రకాశం జిల్లాలో మూడు, కర్నూలు, నెల్లూరు, తూర్పు గోదావరి చిత్తూరు జిల్లాల్లో ఒక్కొక్కరు చొప్పున మొత్తం 21 కేసులు నమోదైనట్లు అధికారులు వెల్లడించారు.