విజయనగరంలో అవినీతి చేపలు.. ఏసీబీకి చిక్కిన ఇద్దరు అధికారులు

విజయనగరం జిల్లాలో ఇద్దరు అవినీతి అధికారులు ఏసీబీ వలలో చిక్కారు. రూ.85 వేలు లంచం తీసుకుంటుండగా.. చైల్డ్ డెవలప్‌మెంట్ ప్రాజెక్టు ఆఫీసర్ పి.మణిమాల, కొత్తవలస ఐసీడీఎస్‌లో సీనియర్ అసిస్టెంట్‌గా పని చేస్తోన్న జీవీకే వేణుగోపాల్‌లను ఏసీబీ అధికారులు రెడ్ హ్యాండెడ్‌గా పట్టుకున్నారు. అడారి సురేశ్ కుమార్ అనే వ్యక్తి అంగన్‌వాడీ కేంద్రాలకు కూరగాయలు, సరుకులను సరఫరా చేస్తుంటారు. ఆయనకు నవంబర్ నెల బిల్లులు రావాల్సి ఉంది.

బిల్లులు క్లియర్ చేయడానికి, కాంట్రాక్టును పొడిగించడం కోసం సురేశ్ కుమార్ నుంచి ఈ ఇద్దరు అధికారులు లంచం డిమాండ్ చేశారు. దీంతో బాధితుడు ఏసీబీని ఆశ్రయించాడు. రూ.85 వేల నగదును వేణుగోపాల్‌కు ఇవ్వగా.. రెడ్ హ్యాండెడ్‌గా పట్టుకున్నారు. అవినీతి అధికారి చేతి వేళ్లకు కెమికల్ అంటుకున్నట్టు పరీక్షలో తేలింది. సదరు అధికారుల వద్ద నుంచి ఆ సొమ్మును రికవరీ చేశారు.