YSRCP కి ఆలీ రాజీనామా చేస్తున్నట్లు ప్రచారం.. క్లారిటీ ఇచ్చిన ప్రముఖ కమెడియన్!

వైఎస్సార్ కాంగ్రెస్ పార్టీలో తనపై కొందరు కుట్రలు చేస్తున్నారని.. ఎవరెన్ని చేసినా పార్టీని వీడేది లేదని ప్రముఖ నటుడు ఆలీ వ్యాఖ్యానించారు. ఆలీ వైసీపీని వీడుతున్నట్లు కొన్ని రోజులుగా వస్తున్న వార్తలను ఆయన ఖండించారు. తాను వైసీపీలో చేరింది పదవుల కోసం కాదని.. వైఎస్ జగన్మోహన్ రెడ్డిని ముఖ్యమంత్రిని చేయాలనే లక్ష్యంతోనే వైసీపీలో చేరినట్లు వెల్లడించారు. తనకు పదవులు ముఖ్యం కాదని.. జగన్ మనసులో స్థానం ముఖ్యమన్నారు. జగన్మోహన్ రెడ్డి మరోసారి ముఖ్యమంత్రి అయ్యేందుకు అంకితభావంతో పనిచేస్తానని ఆలీ స్పష్టం చేశారు.

కాగా, 2019 ఎన్నికలకు ముందు నటుడు ఆలీ వైసీపీలో చేరారు. ఆ ఎన్నికల్లో రాజమండ్రి నుంచి ఎమ్మెల్యేగా బరిలోకి దింపుతారని ప్రచారం జరిగినా.. అప్పటికే ఎన్నికలకు చాలా తక్కువ సమయం ఉండటంతో కుదరలేదు. ఆ తర్వాత నామినేటెడ్ పదవి ఇస్తారని పెద్ద ఎత్తున ప్రచారం జరిగింది. ఇటీవలే రాజ్యసభ సీటు పక్కా అని జోరుగా ప్రచారం జరిగింది. అయితే, ఇప్పటి వరకు ఆలీని ఏ పదవి వరించలేదు. తాను రాజ్యసభ సీటు కూడా ఆశించలేదని ఆలీ వెల్లడించారు.

‘‘సీఎం జగన్ దృష్టిలో నేను ఉన్నాను. భవిష్యత్‌లో ఏ పదవి ఇచ్చినా బాధ్యతగా నిర్వర్తిస్తా. నీకు ఫలానా పదవి ఇస్తామని జగన్ ఎప్పుడూ హామీ ఇవ్వలేదు, ఏదో ఒక పదవి ఇస్తామని గట్టిగా చెప్పారు. నేను ఆ నమ్మకంతోనే ఉన్నాను. సీఎం జగన్ నుంచి ఏదో ఒకరోజు పిలుపు వస్తుంది. ఆరోజు మీడియా ముందుకు వస్తాను’’ అని అలీ ఇటీవల కీలక వ్యాఖ్యలు చేసిన విషయం తెలిసిందే.