ఏపీకి బిగ్ అలర్ట్: 3 రోజులు భారీ వర్షాలు.. ఈ జిల్లాల్లో బీభత్సమే..!

ఆంధ్రప్రదేశ్ రాష్ట్రంలో భారీ వర్షాలు కొనసాగుతున్నాయి. మరికొద్ది రోజుల పాటు రాష్ట్రంలో తేలికపాటి నుంచి భారీ వర్షాలు కురిసే అవకాశం ఉందని వాతావరణ శాఖ వెల్లడించింది. ఆగ్నేయ బంగాళాఖాతం, దాన్ని ఆనుకుని ఉన్న ప్రాంతంలో ఉన్న ఉపరితల ఆవర్తనం ప్రభావం వల్ల అల్పపీడనం ఏర్పడిందని అమరావతి వాతావరణ శాఖ పేర్కొంది.

దీని ప్రభావంతో రాబోయే 36 గంటల్లో నైరుతి బంగాళాఖాతంతో పాటు దాన్ని ఆనుకుని ఉన్న ఆగ్నేయ బంగాళాఖాతం ప్రాంతంలో వాయుగుండంగా బలపడే అవకాశాలు ఉన్నాయని వాతావరణ శాఖ అధికారులు తెలిపారు. ఇది పశ్చిమ వాయువ్య దిశగా ప్రయాణించి , ఉత్తర తమిళనాడు తీరానికి నవంబర్ 11 ఉదయం నాటికి చేరుకునే అవకాశం ఉందని పేర్కొన్నారు.

ఈ క్రమంలో ఆంధ్రప్రదేశ్‌లో రాబోయే మూడు రోజుల పాటు వర్షాలు కురుస్తాయని వాతావరణ శాఖ తెలిపింది. మంగళవారం ఉత్తర కోస్తాంధ్ర, యానాంలో పొడి వాతావరణం ఉంటుందని.. ఇక బుధ, గురువారాల్లో ఉరుములు, మెరుపులతో పాటు తేలికపాటి నుంచి ఓ మోస్తరు వర్షాలు కొన్ని చోట్ల కురిసే అవకాశం ఉందని అధికారులు తెలిపారు. అయితే, గురువారం ఒకటి, రెండు చోట్ల భారీ వర్షాలు కురిసే అవకాశం ఉంది.

దక్షిణ కోస్తాంధ్ర, రాయలసీమలో తేలికపాటి నుంచి భారీ వర్షాలు.. దక్షిణ కోస్తాంధ్రలో మంగళవారం తేలిక పాటి వర్షాలు లేదా జల్లులు ఒకటి లేదా రెండు చోట్ల భారీ వర్షాలు కురిసే అవకాశం ఉంది. బుధ, గురువారాల్లో పలు చోట్ల ఉరుములు, మెరుపులుతో పాటు తేలికపాటి నుంచి ఓ మోస్తరు వర్షాలు విస్తారంగా కురిసే అవకాశం ఉంది. ఒకటి లేదా రెండు చోట్ల భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ తెలిపింది.

బుధ, గురువారాల్లో రాష్ట్రవ్యాప్తంగా ఉరుములు, మెరుపులతో పాటు తేలికపాటి నుంచి ఓ మోస్తరు వర్షాలు అనేక చోట్ల విస్తారంగా కురిసే అవకాశం ఉందని వాతావరణ శాఖ తెలిపింది. అలాగే ఒకటి, రెండు చోట్ల భారీ నుంచి అతి భారీ వర్షాలు కురిసే అవకాశం ఉందని వెల్లడించింది.