కొద్దిమేర తగ్గిన అల్పపీడనం తీవ్రత.. ఏపీలోని ఈ ప్రాంతాల్లో భారీ వర్షాలు

పశ్చిమ మధ్య బంగాళాఖాతంలో మంగళవారం ఏర్పడిన అల్పపీడనం తీవ్రత కొద్ది మేరకు తగ్గిందని అమరావతి వాతావరణ కేంద్రం వెల్లడించింది. అయితే కోస్తాంధ్ర మీదుగా పరిసర ప్రాంతాలపై 3.1 కిలో మీటర్ల ఎత్తులో ఉపరితల ఆవర్తనం కొనసాగుతోందని తెలిపింది. దీని ప్రభావంతో రాష్ట్రంలోని ఉత్తర కోస్తా, దక్షిణ కోస్తాంధ్ర జిల్లాలతో పాటు రాయలసీమ జిల్లాల్లోనూ మోస్తరు నుంచి విస్తారంగా వర్షాలు కురిసే సూచనలు ఉన్నట్లు పేర్కొంది. ఈ మేరకు బుధవారం సాయంత్రం అమరావతి వాతావరణ కేంద్రం ఓ ప్రకటన విడుదల చేసింది.

ఉపరితల ఆవర్తనం ప్రభావంతో రాష్ట్రంలో కొన్ని చోట్ల భారీ వర్షాలు నమోదయ్యే అవకాశం ఉందని అమరావతి వాతావరణ కేంద్రం తెలిపింది. దక్షిణ కోస్తా జిల్లాలైన కృష్ణా, గుంటూరు, ప్రకాశం, నెల్లూరు తదితర ప్రాంతాల్లో ఉరుములతో కూడిన వర్షం కురిసే అవకాశం ఉందని వాతావరణ శాఖ ప్రకటించింది.

మరోవైపు అల్పపీడన ప్రభావంతో రాష్ట్రంలో మరో నాలుగు రోజుల పాటు వర్షాలు కురుస్తాయని అధికారులు అంచనా వేస్తున్నారు. ముఖ్యంగా ఉత్తరాంధ్ర జిల్లాల్లో ఓ మోస్తరు నుంచి భారీ, అతి భారీగా వానలు పడతాయని చెబుతున్నారు. ఈ క్రమంలో ఉమ్మడి విజయనగరం, శ్రీకాకుళం జిల్లాల్లో భారీ నుంచి అతి భారీ వర్షాలకు అవకాశం ఉందని తెలిపారు. దీంతో ఆయా జిల్లాల అధికారులు అప్రమత్తమయ్యారు.