కాపులకు జగన్ సర్కార్ శుభవార్త.. రూ.15వేలు సాయం.. ఏపీ కేబినెట్‌లో కీలక నిర్ణయం

ఆంధ్రప్రదేశ్ కేబినెట్ పలు కీలక నిర్ణయాలు తీసుకుంది. బుధవారం అమరావతిలో జగన్ అధ్యక్షతన జరిగిన కేబినెట్ భేటీలో.. కొత్త పథకాలతో పాటూ కీలక అంశాలపై చర్చించారు. కాపుల కోసం కొత్త పథకం, టీటీడీ పాలకమండలి సభ్యుల సంఖ్య పెంపు, కొత్త రేషన్ కార్డులు, వైఎస్సార్‌ నవశకంతో పాటూ మరికొన్ని నిర్ణయాలకు తీసుకున్నారు. ఏపీ మంత్రివర్గం తీసుకున్న నిర్ణయాలు ఇలా ఉన్నాయి.

*వైఎస్సార్‌ కాపు నేస్తం పథకం కింద కాపు సామాజిక వర్గానికి చెందిన మహిళలకు ఏడాదికి రూ.15వేలు ఆర్థిక సాయం అందజేయాలని నిర్ణయించారు. ఈ పథకానికి రూ.1101కోట్లు కేటాయించాలని నిర్ణయించారు.

* కాపు నేస్తం పథకం కింద 45 ఏళ్లు నిండిన ప్రతి కాపు మహిళకు ఐదేళ్లలో రూ.75వేలు అందజేతకు ఆమోదం తెలిపారు.

* జగనన్న వసతి దీవెన కింద రూ.2300కోట్లు, జగనన్న విద్యా దీవెన కింద రూ.3400కోట్లు కేటాయింపు.

* 10 ఎకరాల మాగాణి, 25 ఎకరాల మెట్ట భూమి, 2.5 లక్షల లోపు ఆదాయం ఉన్నవారికి వసతి దీవెన పథకం వర్తిస్తుందని వివరించారు.

*టీటీడీ పాలకమండలి సభ్యుల సంఖ్య 19 నుంచి 29కి పెంచుతూ నిర్ణయం.

* కడప ఉక్కు పరిశ్రమకు ముడిసరుకు కోసం ఎన్‌ఎండీసీతో ఒప్పందానికి కేబినెట్‌ ఆమోదం.

* నవశకం సర్వే ద్వారా వివిధ ప్రభుత్వ పథకాలకు లబ్ధిదారులను ఎంపిక చేయాలని కేబినెట్ నిర్ణయించింది.

* కాంట్రాక్ట్ ఉద్యోగుల అంశంపై కమిటీ ఏర్పాటుకు కేబినెట్‌ గ్రీన్ సిగ్నల్.

* ఏపీ హైగ్రేడ్‌ స్టీల్‌ కార్పొరేషన్‌ ఏర్పాటుకు కేబినెట్‌ ఓకే.

* ఏపీఎస్‌పీడీసీఎల్‌ను విభజించి సెంట్రల్‌ పవర్‌ డిస్ట్రిబ్యూషన్‌ కార్పొరేషన్‌ ఏర్పాటుకు ఆమోదం.