ఆరోగ్య శ్రీ: ఏపీ ప్రజలకు సీఎం జగన్ శుభవార్త

ఆంధ్రప్రదేశ్ ముఖ్యమంత్రి జగన్‌మోహన్‌రెడ్డి మరోసారి సంచలన నిర్ణయాలు తీసుకున్నారు. శుక్రవారం ఆరోగ్యం, కుటుంబ సంక్షేమంపై సమీక్ష చేసిన జగన్.. ఆరోగ్య ఆంధ్రప్రదేశ్‌కు ఆరు సూత్రాలతో ముందుకు వెళ్లాలన్నారు. నవంబర్ 1 నుంచి హైదరాబాద్, చెన్నై, బెంగళూరుల్లోని 150 ఆస్పత్రుల్లో ఆరోగ్యశ్రీ కింద సేవలు అందించనున్నట్లు సీఎం చెప్పారు. శస్త్రచికిత్స చేయించుకున్నవారికి కోలుకునేంత వరకు నెలకు రూ.5వేలు.. లేదా రోజుకు రూ.225 ఆర్థిక సాయం అందించనున్నారు. ఇది కూడా డిసెంబర్ 1 నుంచి అమలు చేయనున్నారు.

కిడ్నీ వ్యాధులతో బాధపడుతున్నవారికి నెలకు రూ.5వేలు.. తలసేమియా, హిమోఫిలియా బాధితులకు నెలకు రూ.10వేలు.. పక్షవాతం, కండరాల క్షీణత, కాళ్లు చేతులు లేనివారికి రూ.5వేల పింఛన్.. జనవరి 1 నుంచి అమలుకానుంది. డెంగ్యూ, సీజనల్ వ్యాధులకు ఆరోగ్య శ్రీలో చోటు కల్పించాలని నిర్ణయించారు. డిసెంబర్‌ 21న ఆరోగ్య శ్రీ కార్డుల జారీ చేయడంతో పాటూ కంటి వెలుగు పథకాన్ని కాలేజీ పిల్లలకూ వర్తింపజేయాలని సీఎం సూచించారు. ఆస్పత్రుల్లోని శానిటేషన్ వర్కర్ల జీతాలు రూ.16వేలకు పెంచారు.

అలాగే జనవరి 1 నుంచి ప.గో జిల్లాలో 2వేల వ్యాధులకు.. మిగిలిన జిల్లాల్లో 1200 వ్యాధులకు ఆరోగ్య శ్రీ పైలెట్ ప్రాజెక్ట్ కింద అమలు చేయనున్నారు. డెంగ్యూ, సీజినల్ వ్యాధులకు ఆరోగ్య శ్రీ పైలెట్ ప్రాజెక్టులో చోటు కల్పించారు. అలాగే గిరిజన ప్రాంతాల్లో బైకుల ద్వారా మారుమూల ప్రాంతాలకు వైద్య సేవలు అందించడంతో పాటూ.. ఆరోగ్యశ్రీలో డబుల్ కాంక్లియర్ ఇంప్లాంట్‌ను చేర్చాలన్నారు సీఎం. కంటివెలుగు మాదిరిగా ప్రజలందరికీ ఆరోగ్య పరీక్షలు చేయాలని నిర్ణయించారు. ప్రతి నియోజకవర్గంలో ప్రసూతి ఆస్పత్రి ఏర్పాటు చేయాలని జగన్ సూచించారు. అలాగే రోడ్డుప్రమాదంలో గాయపడ్డవారికి ఆస్పత్రిలో డబ్బు కోసం వేచి చూసే అవసరం లేకుండా చర్యలు తీసుకోవాలన్న జగన్.. ప్రభుత్వం నుంచి కొంత మొత్తాన్ని కేటాయించాలన్నారు.