ఏపీకి శుభవార్త: భారీగా పడిపోయిన కరోనా మరణాలు.. ఆ 2 జిల్లాల్లో అత్యల్ప కేసులు!

ఆంధ్రప్రదేశ్‌లో కరోనా వైరస్ కేసులు మళ్లీ స్వల్పంగా పెరిగాయి.అయితే కరోనా మరణాలు మాత్రం భారీగా పడిపోయాయి. ఈసారి కరోనా వైరస్ నిర్ధారణ పరీక్షలు తగ్గించినా, కేసుల్లో మాత్రం పెరుగుదల నమోదైంది. ఈ మేరకు శనివారం రాష్ట్ర వైద్య, ఆరోగ్య శాఖ విడుదల చేసిన బులిటెన్‌లో గడిచిన 24 గంటల్లో 43,770 మందికి కరోనా వైరస్ నిర్ధారణ పరీక్షలు నిర్వహించగా 158 మందికి పాజిటివ్‌గా నిర్ధారణ అయింది. దీంతో రాష్ట్రంలో కరోనా సోకిన వారి సంఖ్య 8,86,852కి చేరింది.

ఇక, రాష్ట్రంలో మళ్లీ కరోనా మరణాలు మళ్లీ అత్యల్ప స్థాయికి పడిపోయాయి. శనివారం విశాఖపట్నంలో ఒకరు కరోనా బారినపడి మరణించారు. దీంతో ఇప్పటి వరకు రాష్ట్రవ్యాప్తంగా కరోనా మహమ్మారి బారినపడి మృతి చెందిన వారి సంఖ్య 7,147కి చేరింది.

అలాగే రాష్ట్రంలో డిశ్చార్జిల సంఖ్య స్వల్పంగా పెరిగింది. కరోనా మహమ్మారి బారి నుంచి శనివారం మొత్తం 172 మంది పూర్తిగా కోలుకుని డిశ్చార్జి అయ్యారు. దీంతో ప్రస్తుతం రాష్ట్రంలో 8,78,232 మంది కరోనా మహమ్మారి బారి నుంచి పూర్తిగా కోలుకుని డిశ్చార్జి కాగా, ప్రస్తుతం యాక్టివ్‌ కేసులు 1,473కు పడిపోయాయి. రాష్ట్రవ్యాప్తంగా ఇప్పటి వరకు 1,28,31,731 శాంపిల్స్‌ను పరీక్షించినట్లు ప్రభుత్వం బులెటిన్‌లో పేర్కొంది.

ఇక, శనివారం తూర్పుగోదావరి జిల్లాలో అత్యధికంగా 35 కరోనా కేసులు నమోదు కాగా.. నెల్లూరు, విజయనగరం జిల్లాల్లో అత్యల్పంగా ఒక్కో కేసు చొప్పున నమోదయ్యాయి. విజయనగరం జిల్లాలో ప్రస్తుతం యాక్టివ్ కేసులు రాష్ట్రంలోనే అత్యల్పంగా 35 ఉన్నాయి.