ఏపీ ప్రజలకు అలర్ట్.. విద్యుత్ బిల్లు చెల్లించకపోయినా!

కరోనా ఎఫెక్ట్, లాక్‌డౌన్‌తో విద్యుత్ బిల్లుల విషయంలో ఏపీ ప్రభుత్వం కీలక నిర్ణయం తీసుకున్న సంగతి తెలిసిందే. గత మార్చి బిల్లును ఏప్రిల్‌కు చెల్లిస్తే సరిపోతుందని క్లారిటీ ఇచ్చారు అధికారులు. అయితే తాజాగా ఆంధ్ర‌ప్ర‌దేశ్ విద్యుత్ శాఖ మరో కీల‌క నిర్ణ‌యం తీసుకున్నట్లు తెలుస్తోంది. గృహ, పారిశ్రామిక విద్యుత్తు వినియోగదారులు ఏప్రిల్‌లో చెల్లించాల్సిన బిల్లు చెల్లించకున్నా సరఫరా నిలిపేయకూడదని నిర్ణయించినట్లు సమాచారం. లాక్‌డౌన్‌ కావడంతో కొన్ని సమస్యలు ఉండటంతో ఈ నిర్ణయం తీసుకున్నారట.

సాధారణంగా కరెంట్ బిల్లు వచ్చిన రోజు నుంచి 14 రోజుల్లో చెల్లించాలి. ఒకవేళ ఎవరైనా బిల్ చెల్లించకపోయినా. కాస్త ఆలస్యమైనా రీకనెక్షన్‌ ఛార్జీలను వసూలు చేస్తారు. వారం రోజుల తర్వాత విద్యుత్ సరఫరాను నిలిపివేస్తారు. లాక్‌డౌన్ సమయం కావడంతో ఏపీ విద్యుత్ శాఖ ఈ నిబంధనల్ని కాస్త స‌డలించింది. కరెంట్ బిల్లుల్ని ఆలస్యంగా చెల్లించిన వినియోగదారుల నుంచి జరిమానా వసూలు చేయకూడదని అధికారులు భావిస్తున్నారు. దీనిపై అధికారికంగా నిర్ణయం తీసుకోవాల్సి ఉందని విద్యుత్‌శాఖలో పనిచేసే ఓ అధికారి తెలిపారు. దీనిపై త్వరలోనే క్లారిటీ రావాల్సి ఉంది.