గోదావరి జిల్లాలకు జగన్ సర్కార్ శుభవార్త

ఉభయ గోదావరి జిల్లాల్లో వరద బాధితులను ఆదుకునేందుకు ఏపీ ప్రభుత్వం ముందుకొచ్చింది. పరిహారం కింద గోదావరి జిల్లాలకు రూ. 10 కోట్లు నిధులు విడుదల చేస్తూ జీవో జారీ చేసింది. ఈ నిధుల్లో రూ. 7,21,75,000 తూర్పు గోదావరి జిల్లాకు కేటాయించగా.. రూ. 2,87,45,000 పశ్చిమ గోదావరి జిల్లాకు కేటాయించింది. అధికారులు ఈ పరిహారాన్ని వరద బాధితులకు త్వరలోనే అందజేయనున్నారు. వరద బాధితులను తక్షణమే ఆదుకునేందుకు జిల్లా కలెక్టర్లు ఇచ్చిన సిఫార్సులతో ఈ నిధులు విడుదల చేశారు. గోదావరి వరదల కారణంగా ఇళ్లు నష్టపోయిన కుటుంబాలకు రూ. 5వేల చొప్పున సాయం అందజేసేందుకు నిధులు కేటాయించారు. నిబంధనలకు అనుగుణంగా ఈ సాయం అందుకునే లబ్ధిదారుల పూర్తి వివరాలు సేకరించి.. ప్రభుత్వానికి పంపాలని ఉభయ గోదావరి జిల్లాల కలెక్టర్లను ఆదేశించారు. వరదల కారణంగా నష్టపోయిన బాధితులను గుర్తించి వారికి సాయం అందజేయాలని ప్రభుత్వం సూచించింది.