విశాఖ వైపు దూసుకొస్తున్న అసని తుఫాను.. ఈ ప్రాంతాల్లో పిడుగులు పడే ఛాన్స్!

‘అసని’ తుఫాను తీవ్రత ఆంధ్రప్రదేశ్ ప్రజల్లో ఆందోళన రేకెత్తిస్తోంది. తుఫాను ప్రభావంతో రాష్ట్రవ్యాప్తంగా ఇప్పటికే వాతావరణం మారిపోయింది. అసని తుఫాను దక్షిణ బంగాళాఖాతం నుంచి ఇప్పుడు నేరుగా విశాఖపట్నం తీరం వైపు కదులుతోందని ఏపీ వెదర్‌మ్యాన్ తెలిపారు. ఈ మేరకు సోమవారం ఉదయం ఆయన ఫేస్‌బుక్‌లో పోస్ట్ చేశారు. అసని తుఫాను తీవ్రతలో సోమవారం రాత్రి దాక ఎలాంటి మార్పు ఉండదని.. కానీ, అర్ధరాత్రి నుంచి మెళ్లగా దీని ప్రభావం మొదలవుతుందని పేర్కొన్నారు.

మంగళవారం తెల్లవారుజామున ఉత్తరాంధ్ర జిల్లాలు విశాఖపట్నం నగరం, అనకాపల్లి, విజయనగరం, శ్రీకాకుళం, పార్వతీపురం జిల్లాలతో పాటు కాకినాడ, తూర్పు గోదావరి జిల్లాల్లో కూడ తేలికపాటి నుంచి మోస్తరు వర్షాలు కురుస్తాయని వెదర్‌మ్యాన్ పేర్కొన్నారు గతంలో చెప్పినట్టుగానే ఇది ఆంధ్రప్రదేశ్ రాష్ట్రం కోస్తా తీరానికి చాలా దగ్గరగా వచ్చే అవకాశాలు 100 శాతం కనిపిస్తున్నాయని తెలిపారు. తీరం దగ్గరకు వచ్చి మళ్లీ దారి మలచుకోని బంగ్లాదేశ్ వైపుగా వెళ్లనుందని పేర్కొన్నారు. ప్రస్తుతానికి ఈ తుఫాను బలహీన పడుతోందని వివరించారు.


ఇక, గుంటూరు నగరంతో పాటుగా విజయవాడ నగరంలోని పలు భాగాల్లో ప్రస్తుతం వర్షాలు కురుస్తున్నాయని.. ఈ వానలతో పాటు ఈదురుగాలులు, పిడుగులు అక్కడక్కడ పడే ప్రమాదం ఉందని హెచ్చరించారు. దయజేసి జాగ్రత్తపడాలని సూచించారు. అలాగే, కడప నగరంలో కొన్ని ప్రాంతాల్లో వర్షాలు కొనసాగనున్నాయని తెలిపారు.