ఉమ్మడి ఏపీ అసెంబ్లీ మాజీ స్పీకర్ అగరాల కన్నుమూత

ఉమ్మడి ఆంధ్రప్రదేశ్ అసెంబ్లీ మాజీ స్పీకర్ అగరాల ఈశ్వర్ రెడ్డి (87) ఆదివారం కన్నుమూశారు. గత కొంతకాలంగా అనారోగ్యంతో బాధపడుతున్న ఆయన తిరుపతిలోని స్విమ్స్‌లో చికిత్స పొందుతూ తుదిశ్వాస విడిచారు. 1933 డిసెంబర్ 28న చిత్తూరు జిల్లా, రేణిగుంట మండలం తూకివాకం గ్రామంలో జన్మించారు. 1957లో తూకివాక గ్రామ సర్పంచ్‌గా ఎన్నికయ్యారు. 1962లో కాంగ్రెస్ పార్టీ తరఫున తొలిసారి ఎమ్మెల్యేగా పోటీ చేసి ఓడిన ఆయన.. రెండోసారి తిరుపతి నుంచి పోటీ చేసి భారీ మెజార్టీతో విజయం సాధించారు.

1981-82లో డిప్యూటీ స్పీకర్‌గా పని చేశారు. అనంతరం కొన్నాళ్లపాటు స్పీకర్‌గా పని చేశారు. 1983లో ఆయన ఎన్టీఆర్‌కు ప్రత్యర్థిగా పోటీ చేసి ఓడారు. జగన్ తీసుకున్న మూడు రాజధానుల నిర్ణయాన్ని ఆయన ఇటీవలే సమర్థించారు. కర్నూలులో హైకోర్టు, విశాఖలో రాజధాని ఉండటం వల్ల అన్ని ప్రాంతాల ప్రజలకు మేలు జరుగుతుందని ఆయన అభిప్రాయపడ్డారు.

చంద్రబాబు అమరావతి కోసం జోలె పట్టుకొని తిరగడం సిగ్గుచేటన్నారు. ‘చంద్రబాబు దగ్గర లక్షల కోట్లు ఉన్నాయి. ఎమ్మెల్యేలను కొనగలడు. ఇంకా ఆయనకు జోలె ఎందుకు’ అని ఆయన ఘాటైన వ్యాఖ్యలు చేశారు. బాబు, అగరాల ఒకే జిల్లాకు చెందినప్పటికీ.. ఆయన టీడీపీకి వ్యతిరేకంగానే వ్యవహరించారు.