సీఎం జగన్ ఇంట విషాదం

ఏపీ సీఎం వైఎస్‌ జగన్‌మోహన్‌రెడ్డి ఇంట విషాదం నెలకొంది. ఆయన పెద్దమామ ఈసీ పెద్ద గంగిరెడ్డి కన్నుమూశారు. గంగిరెడ్డి.. జగన్ సతీమణి వైఎస్‌ భారతిరెడ్డికి పెద్దనాన్న అవుతారు. ప్రస్తుతం ఆయన వయసు 78 సంవత్సరాలు. గత కొంతకాలంగా అనారోగ్యంతో బాధపడుతున్న పెద్ద గంగిరెడ్డి.. పులివెందులలోని ఓ ఆసుపత్రిలో కొద్దిరోజులుగా చికిత్స పొందారు. అయితే ఇటీవల స్వగ్రామం అయిన వేముల మండలం గొల్లలగూడూరులోని తన ఇంటికి చేరుకున్నారు.

Read More: కరోనా బాధితులకు రూ. 2వేల సాయం తాత్కాలికంగా నిలిపివేత.. కారణం ఇదేనట!

శనివారం ఉదయం 5 గంటల సమయంలో ఆయన ఆరోగ్య పరిస్థితి మరింత విషమించింది. దీంతో చికిత్స కోసం ఆయనను పులివెందులకు తరలించే ప్రయత్నం చేశారు. అయితే మార్గం మధ్యలోనే ఆయన తుదిశ్వాస విడిచారు. దీంతో పెద్ద గంగిరెడ్డి భౌతికకాయాన్ని గొల్లలగూడూరు గ్రామానికి తీసుకొచ్చారు. విషయం తెలిసిన వెంటనే సీఎం వైఎస్‌ జగన్‌ కుటుంబసభ్యులకు ఫోన్ చేసి పరామర్శించారు. జగన్ తల్లి , వైఎస్సార్‌సీపీ గౌరవాధ్యక్షురాలు వైఎస్‌ విజయమ్మ, అలాగే సీఎం సతీమణి వైఎస్‌ భారతిరెడ్డి గొల్లల గూడూరు గ్రామానికి చేరుకున్నారు. గంగిరెడ్డి భౌతికఖాయానికి నివాళులు అర్పించారు.