కరోనా వ్యాక్సిన్ వచ్చేస్తోంది.. జనవరి కల్లా అందుబాటులోకి.. సీఎం జగన్ కీలక వ్యాఖ్యలు

ఆంధ్రప్రదేశ్‌లో కరోనా కేసులు తగ్గుముఖం పట్టడం మంచి పరిణామమని ముఖ్యమంత్రి వైఎస్‌ జగన్మోహన్‌రెడ్డి పేర్కొన్నారు. వచ్చే జనవరి కల్లా కోవిడ్ వ్యాక్సిన్ వచ్చే అవకాశం ఉందన్నారు. రాష్ట్రంలో కరోనా పాజిటివిటీ రేట్‌ 12.0 నుంచి 8.3 శాతానికి తగ్గుతుందని చెప్పారు. రాష్ట్రంలో కరోనా పరీక్షలు పెరిగాయని.. కానీ, కేసులు తగ్గుతున్నాయని సీఎం జగన్ పేర్కొన్నారు. ఈ మేరకు మంగళవారం కరోనా నివారణ చర్యలపై సీఎం జగన్ సమీక్ష నిర్వహించారు. ఈ సందర్భంగా సీఎం జగన్ మాట్లాడుతూ.. కోవిడ్‌ తగ్గుతుందనడానికి ఇదే నిదర్శనమని, కోవిడ్‌తో సహజీవనం చేస్తూనే, అప్రమత్తంగా ఉండాలని సూచించారు.

జనవరికల్లా వ్యాక్సిన్‌ వచ్చే అవకాశం కనిపిస్తోందని సీఎం జగన్ ఆశాభావం వ్యక్తం చేశారు. 104 నంబర్‌కు ఫోన్‌ కొట్టిన వెంటనే టెస్ట్‌లు, హాస్పిటల్స్ వివరాలు అందాలని సీఎం జగన్ అన్నారు. ఈ నంబర్‌కు మాక్‌ కాల్స్‌ చేసి నంబర్‌ పనిచేస్తుందా లేదా పీరియాడికల్‌గా చెక్‌ చేయాలని, ఎక్కడైనా లోటుపాట్లు ఉంటే వెంటనే సరి చేసుకోవాలన్నారు. ఈ నంబర్‌కు ఫోన్‌ చేయగానే అరగంటలోనే బెడ్‌ అందుబాటులో ఉందో లేదో చెప్పాలని అధికారులను ఆదేశించారు.

ఆరోగ్యశ్రీ కింద కోవిడ్‌కు ఉచితంగా వైద్య సేవలు చేస్తున్న రాష్ట్రం ఆంధ్రప్రదేశ్ అని, కోవిడ్‌ ఆస్పత్రుల జాబితా గ్రామ సచివాలయాల్లో ఉండాలని సీఎం జగన్ అన్నారు. ఎంప్యానల్‌ ఆస్పత్రుల లిస్టు కూడా అందుబాటులో ఉండాలన్నారు.

మనం చంద్రబాబు అనే వ్యక్తితో కాక, నెగిటివ్‌ మైండ్‌సెట్‌తో ఉన్న కొన్ని మీడియా సంస్థలతో కూడా యుద్ధం చేస్తున్నామని సీఎం జగన్ పేర్కొన్నారు. మనం ఎంత మంచి చేస్తున్నా వేలెత్తి చూపే దుర్భుద్దితో పనిచేస్తున్నారని విమర్శించారు. అత్యంత జాగ్రత్తగా ఉండటం అవసరమన్నారు. అలాగే నెగిటివ్‌ వార్తలు కూడా చదువుదామని, మనం కరెక్ట్‌ చేయాల్సినవి ఏమైనా ఉంటే చేసుకుందాం, వారు అతిగా రాసినవి కూడా ఎత్తిచూపుదామని సీఎం వైఎస్‌ జగన్‌ అన్నారు.