‘కృష్ణా కరకట్ట’ పేదలకు సీఎం జగన్ బంపరాఫర్

కృష్ణా కరకట్ట వాసులకు ఏపీ సీఎం జగన్ బంపరాఫర్ ప్రకటించారు. కరకట్టపైన, కరకట్ట లోపల ఉన్న పేదలకు ఇళ్లు నిర్మించి ఇవ్వాలని మున్సిపల్ శాఖ అధికారులను ఆదేశించారు. సచివాలయంలో శుక్రవారం పురపాలక శాఖపై సీఎం జగన్ సమీక్ష జరిపారు. కరకట్ట వెంబడి ఇళ్లు కోల్పోయిన పేదలకు వారు కోరిన చోట ఇళ్లు నిర్మించి ఇవ్వాలని జగన్ ఆదేశించారు. ఇప్పటి వరకు ఒకటిన్నర సెంట్ల స్థలంలో ఇళ్లు నిర్మించి ఇచ్చేవారు. కరకట్ట వాసులకు రెండు సెంట్ల స్థలంలో మంచి డిజైన్లతో ఇళ్లు నిర్మించి ఇవ్వాలని సీఎం ఆదేశించారు. ఉగాది నాటికి ఇళ్ల ప్రక్రియ పూర్తవ్వాలన్నారు. అలాగే ప్రభుత్వ స్థలాల్లో ఇళ్లు వేసుకుని నివసిస్తున్న పేదలకు ఇళ్ల పట్టాలు ఇవ్వాలని సీఎం ఆదేశించారు.

Also Read:‘జైలుకెళ్లడానికి అధికారులు సిద్ధంగా లేరు విజయసాయి గారూ!’

మున్సిపల్ శాఖ పరిధిలో అండర్ గ్రౌండ్ డ్రైనేజీ, మురుగునీటి శుద్ధికి సంబంధించి సీఎం జగన్ కీలక నిర్ణయాలు తీసుకున్నారు. ప్రతి మున్సిపాలిటీలో అండర్ గ్రౌండ్ డ్రైనేజీ ఏర్పాటుకు ప్రతిపాదనలు సిద్ధం చేయాలని అధికారులను ఆదేశించారు. మురుగునీటి శుద్ధి కేంద్రం, ఘన వ్యర్థాల నిర్వహణ కేంద్రాలు తప్పనిసరిగా ఉండాలన్నారు. పట్టణాల్లో వ్యర్థాల సేకరణ ప్రక్రియ సరిగ్గా జరగడం లేదని, పటిష్ట చర్యలు చేపట్టాలన్నారు.

Read Also: ‘శ్రీవారికి కేసీఆర్ పట్టువస్త్రాలు.. తిరుమలను తెలంగాణకు ఇచ్చేస్తారా?’

రాజధాని ప్రాంత పరిధిలోని తాడేపల్లి, మంగళగిరిని మోడల్‌ మున్సిపాలిటీలుగా అభివృద్ధి చేసేందుకు ప్రణాళికలు రూపొందించాలని సూచించారు. తాడేపల్లి, మంగళగిరి ప్రాంతాల్లో ఇళ్లులేని పేదలకు గృహాలు మంజూరు చేయాలని సీఎం ఆదేశించారు. తాడేపల్లిలో కనీసం 15 వేల ఇళ్లు ఇవ్వాలన్నారు. ఉగాది నాటికి అందరికీ ఇళ్ల పట్టాలు ఇవ్వాలని సూచించారు. తాడేపల్లి మున్సిపాలిటీలో 100 పడకల ఆస్పత్రికి ప్రతిపాదనలు సిద్ధం చేయాలని అధికారులను సీఎం ఆదేశించారు.