ఎస్సైపై సీఎం వైఎస్ జగన్ ప్రశంసలు.. కారణమిదే..!

ఆపదలో ఉన్న మహిళను రక్షించిన ఎస్సైని సీఎం వైఎస్ జగన్ అభినందించారు. కాల్వలో కొట్టుకుపోతున్న మహిళను ప్రాణాలకు తెగించి కాపాడిన ఎస్సై ధైర్యసాహసాలను ప్రశంసించారు. విపత్కర పరిస్థితిలో సకాలంలో స్పందించి ఓ నిండుప్రాణాన్ని కాపాడిన రిజర్వ్ ఎస్సై అర్జునరావు మంగళవారం తాడేపల్లిలోని సీఎం క్యాంపు కార్యాలయానికి వచ్చి వైఎస్ జగన్‌ని కలిశారు.

విజయవాడ కృష్ణలంక ప్రాంతంలోని బందరు కాలువలో దూకి ఆత్మహత్యాయత్నం చేసిన మహిళను రక్షించిన రిజర్వు సబ్‌ ఇన్స్పెక్టర్‌ అర్జునరావును ముఖ్యమంత్రి వైఎస్‌ జగన్‌ అభినందించారు. ఆయన సాహసాన్ని ప్రశంసించారు. సీఎం జగన్‌ కాన్యాయ్‌ పైలెట్‌ ఆపీసర్‌గా విధులు నిర్వహిస్తున్న అర్జునరావు సీఎం క్యాంపు కార్యాలయంలో ముఖ్యమంత్రి జగన్‌ను కలిశారు. సీఎం జగన్‌ ఆయనపై ప్రశంసల జల్లు కురిపించారు. ప్రభుత్వం నుంచి ప్రధానమంత్రి లైఫ్‌ సేవింగ్‌ మెడల్‌కు రికమెండ్‌ చేయాలని అధికారులను ఆదేశించారు.

లక్మీ అనే మహిళ కుటుంబ సమస్యలతో సోమవారం కాల్వలో దూకి ఆత్మహత్యాయత్నానికి పాల్పడ్డారు. కాల్వలో కొట్టుకుపోతున్న మహిళను చూసి స్థానికులు కేకలు వేయడంతో అటువైపు వెళ్తున్న అర్జునరావు స్పందించారు. కాల్వలో కొట్టుకుపోతున్న మహిళను చూసి వెనుకాముందు ఆలోచించకుండా కాల్వలోకి దూకేశారు. ఈదుకుంటూ వెళ్లి మహిళను ఒడ్డుకు తీసుకొచ్చారు. అనంతరం ఆమెకు ప్రాథమిక చికిత్స అందించి ప్రాణాలు కాపాడారు.