వైఎస్ పేరుతో జగన్ కొత్త పథకం.. విద్యార్థులకు స్పెషల్

ఏపీలో మరో వినూత్న పథకానికి శ్రీకారం చుట్టింది జగన్ సర్కార్. ‘డాక్టర్ వైఎస్‌ఆర్ చిరునవ్వు’ పథకం పేరుతో ఒకటో నుంచి 6వ తరగతి చదివే విద్యార్థులకు ఉచితంగా దంత వైద్యం అందిస్తారు. విద్యార్థులకు పీహెచ్‌సీలలో డెంటల్ చెకప్ చేసి.. ప్రతి ఒక్కరికి ఉచితంగా టూత్‌పేస్ట్, బ్రష్ అందించనున్నారు. 60 లక్షల మంది చిన్నారులకు స్క్రీనింగ్‌ చేసేలా ప్రభుత్వం కసరత్తు చేస్తోంది. గురువారం వైద్య, ఆరోగ్య శాఖపై అధికారులతో సమీక్ష నిర్వహించిన ముఖ్యమంత్రి జగన్.. ఈ పథకంపై చర్చించారు. వైఎస్‌ఆర్ జయంతి రోజు జులై 8న పథకాన్ని ప్రారంభించేందుకు చర్యలు తీసుకోవాలని సూచించారు.

ఇటు విలేజ్ క్లినిక్‌ల ఏర్పాటుపైనా సీఎం జగన్ రివ్యూ చేశారు. రాష్ట్రవ్యాప్తంగా రెండు వేల జనాభాను ఒక యూనిట్‌గా తీసుకుని అక్కడి పరిస్ధితులకు తగినట్లుగా క్లినిక్‌ ఏర్పాటు చేయాలని అధికారులకు సూచించారు. బీఎస్సీ నర్సింగ్‌ చదివిన నర్సు ఈ క్లినిక్‌లో అందుబాటులో ఉండాలని.. రూపాయి ఖర్చు లేకుండా ఉచితంగా వైద్యం చేయడం లక్ష్యంగా ముందుకుసాగాలన్నారు. ప్రతీ గ్రామ, వార్డు సచివాలయం ఉన్న చోట క్లినిక్‌ అందుబాటులో ఉండాలన్నారు.

రాష్ట్రంలో ఏ సేవ అయినా డోర్‌ డెలివరీ చేసే కార్యక్రమం చేస్తున్నామన్నారు సీఎం. వైఎస్సార్‌ విలేజ్‌ క్లినిక్‌ రెఫరల్‌ పాయింట్‌లా ఉండాలని.. మిడ్‌ లెవల్‌ హెల్త్‌ ప్రొవైడర్‌లా పనిచేయాలని.. రోగికి ఏదైనా జరిగితే వెంటనే అక్కడికి వెళ్తే ఉచితంగా వైద్యం అందుతుందనే భరోసా కల్పించాలన్నారు. డబ్బు ఖర్చు కాకుండా వైద్యం ఉచితంగా అందించేందుకే విలేజ్ క్లినిక్‌లు ఏర్పాటు చేస్తున్నామని.. చిన్న సమస్యలకు చికిత్సలు అందించాలన్నారు.

రాష్ట్రంలో 25 పార్లమెంట్‌ నియోజకవర్గాల్లో 25 టీచింగ్‌ హాస్పిటల్స్‌ ఉండాల్నారు జగన్. టీచింగ్‌ ఆసుపత్రులకు అవసరమైన మౌలిక సదుపాయాలన్నీ పక్కాగా ఏర్పాటు చేసుకోవాలని.. డాక్టర్లు, నర్సుల కొరత అధిగమించేందుకు జిల్లాకు ఒక టీచింగ్‌ హాస్పిటల్‌ ఉంటే బాగుంటుందని అభిప్రాయపడ్డారు. ప్రతి టీచింగ్‌ హాస్పిటల్‌లో డెంటల్‌ ఎడ్యుకేషన్‌ కూడా ఉండాలన్నారు.