కేసీఆర్, చంద్రబాబు బాటలో జగన్.. ఆగస్ట్‌కు ఫస్ట్ టార్గెట్!

ఆంధ్రప్రదేశ్ ముఖ్యమంత్రి వైఎస్ జగన్‌మోహన్‌రెడ్డి పథకాలు, ప్రాజెక్ట్‌లపై ఫోకస్ పెట్టారు. నేరుగా సీఎం రంగంలోకి దిగుతున్నారు.. తెలంగాణ సీఎం కేసీఆర్, మాజీ ముఖ్యమంత్రి చంద్రబాబు స్టైల్‌లో ప్రాజెక్ట్‌ పనుల్ని పరుగులు పెట్టించేందుకు క్షేత్రస్థాయిలో పర్యటనలు మొదలు పెట్టారు. జగన్ గురువారం ప్రకాశం జిల్లాలో కీలకమైన వెలుగొండ ప్రాజెక్టు పరిశీలనకు వెళ్లారు. అక్కడ పనుల్ని పరిశీలించి.. ఇరిగేషన్ అధికారులతో జగన్‌ సమీక్ష సమావేశం ఏర్పాటు చేశారు.

ఈ ఏడాది ఆగస్టు నాటికి వెలుగొండ మొదటి దశ పనులు పూర్తిచేయాలని జగన్ సూచించారు. లక్షా 18వేల ఎకరాలకు సాగునీరు.. మూడున్నర లక్షల మంది ప్రజలకు తాగునీరు అందించే లక్ష్యంగా ముందుకు సాగాలి అన్నారు. ప్రాజెక్ట్ పనుల్ని మరింత వేగవంతం చేయాలని అధికారుల్ని ఆదేశించారు. వెలిగొండ ప్రాజెక్ట్ ద్వారా పశ్చిమ ప్రకాశం ప్రాంతమంతా సస్యశామలం చెయ్యాలని దృఢ సంకల్పంతో ఉన్నామంటున్నారు.

ఇక కొల్లం వాగు దగ్గర హెడ్ రెగ్యులేటర్ పనులు మార్చి 1న ప్రారంభించి.. సొరంగం రెండువైపులా ఒకేసారి తవ్వకాలు జరపాలని ముఖ్యమంత్రి ఆదేశించారు. అనుకున్న సమయానికి పనులు పూర్తి కావాలంటే రూ.1800 కోట్లు అవసరమని అధికారులు తెలపగా.. వెంటనే రూ. 1158 కోట్లు విడుదల చేస్తామని సీఎం జగన్ చెప్పారు.