ఏపీ మంత్రికి ముప్పు.. బుల్లెట్‌ప్రూఫ్ వాహనం కేటాయింపు

రాష్ట్ర వ్యవసాయశాఖ మంత్రి కురసాల కన్నబాబుకు ఆంధ్రప్రదేశ్ ప్రభుత్వం బుల్లెట్‌ ప్రూఫ్‌ వాహనాన్ని కేటాయించింది. భద్రతా కారణాల రీత్యా ఇంటెలిజెన్స్‌ నివేదిక మేరకు మంత్రి కన్నబాబుకు బులెట్ ప్రూఫ్ వాహనం కేటాయించేందుకు హోంశాఖ ఈ నిర్ణయం తీసుకుంది. 10 రోజుల క్రితం మంత్రి కన్నబాబుకు బీపీ (బుల్లెట్ ప్రూఫ్) వాహనం కేటాయించాలని ఇంటెలిజెన్స్‌ వర్గాలు నివేదిక ఇచ్చాయి.

మంత్రి కన్నబాబు ఎక్కువగా ప్రజలతో మమేకం కావడం, సాధారణ వాహనంపై తిరుగుతుండటంతో ఆయన భద్రతకు ముప్పు ఉందని ఇంటెలిజెన్స్ వర్గాలు వెల్లడించాయి. దీంతో భద్రతా కారణాల రీత్యా ఆయనకు బుల్లెట్ ప్రూఫ్ వాహనం కేటాయించాలని ప్రభుత్వం నిర్ణయించింది. ఇక నుంచి తమకు కేటాయించిన బుల్లెట్‌ ప్రూఫ్‌ వాహనంలోనే ప్రయాణాలు, పర్యటనలు చేపట్టాలని మంత్రి కన్నబాబుకు ఇంటెలిజెన్స్‌ వర్గాలు సూచించాయి. ఈ విషయంలో తమకు సహకరించాలని విజ్ఞప్తి చేసింది.