కడపకు చెందిన కృష్ణారెడ్డికి జగన్ సర్కార్ కీలక పదవి.. కేబినెట్ మంత్రి హోదా!

ఆంధ్రప్రదేశ్‌లోని వైసీపీ ప్రభుత్వం మరో సలహాదారును నియమిస్తూ ఉత్తర్వులు జారీ చేసింది. వైఎస్సార్ కడప జిల్లాకు చెందిన అంబటి కృష్ణారెడ్డిని ఆంధ్రప్రదేశ్ ప్రభుత్వం సలహాదారుగా నియమించింది. ఏపీ ప్రభుత్వ సలహాదారు పదవికి సీనియర్ జర్నలిస్టు రామచంద్రమూర్తి రాజీనామా చేసిన రెండు రోజుల్లోనే కొత్తగా మరో సలహాదారును జగన్ సర్కార్ నియమించింది. రాష్ట్రంలో వ్యవసాయ సంబంధిత అంశాలపై అంబటి కృష్ణారెడ్డి ప్రభుత్వానికి సలహాలు, సూచనలు ఇవ్వనున్నారు.

అంబటి కృష్ణారెడ్డికి ప్రభుత్వ సలహాదారు పదవితో పాటు కేబినెట్ మంత్రి ర్యాంకును కూడా వైసీపీ ప్రభుత్వం కల్పించింది. పదవీ బాధ్యతలు చేపట్టిన నాటి నుంచి రెండు సంవత్సరాల పాటు ఆయన ప్రభుత్వ సలహాదారుగా కొనసాగుతారు. అంబటి కృష్ణారెడ్డికి నెలకు రూ.1,14,000 వేతనం అందించనున్నారు. అలాగే అలవెన్సులు కింద రూ.15,000 చెల్లిస్తారు. సొంత కారు ఉంటే దానికి పెట్రోల్ కోసం ప్రభుత్వం నెలకు రూ.30,000 చెల్లించనుంది. ఇంటి అద్దెకు నెలకు రూ.లక్ష, మంత్రులకు ఎలాంటి మెడికల్ రీయింబర్స్ ఉంటాయో అలాంటి సదుపాయాలు, సెక్యూరిటీ నియామకం కోసం నెలకు రూ. 25,000 చెల్లించనుంది. ఇల్లు ఊడ్చే వారికి నెలకు రూ.6000 ఇస్తారు.

అలాగే అంబటి కృష్ణారెడ్డికి కారు కొనుక్కోవడానికి రూ.10 లక్షలు లోన్ లేదా అడ్వాన్స్‌గా ప్రభుత్వం ఇవ్వనుంది. ల్యాప్ టాప్ లేదా కంప్యూటర్ కోసం రూ. 50,000, ఫర్నీచర్ కోసం రూ. 3,00,000, వంట సామగ్రి కోసం రూ.1,50,000 లోన్ అందించనున్నారు. అలాగే అంబటి కృష్ణారెడ్డికి ప్రైవేట్ సెక్రటరీ (1), అడిషనల్ పీఏ (1), బయటి నుంచి మరో పీఏ (1), ఆఫీసు సబార్డినేట్స్ (3), జామేదార్ (1), అదనపు డ్రైవర్ (1), డ్రైవర్ (1) చొప్పున సిబ్బందిని ప్రభుత్వం కేటాయించింది. అలాగే, ప్రభుత్వం తరఫున రెండు ఫోన్ కనెక్షన్లు కూడా అందిస్తారు. వాటిలో ఒకదానికి ఎస్టీడీ సౌకర్యం ఉంటుంది.