‘అమ్మ ఒడి’కి మరో రూ. 1,000 కోత.. ఇక, చేతికొచ్చేది రూ. 13 వేలే!

‘జగనన్న అమ్మఒడి’ పథకం లబ్ధిదారులకు రాష్ట్ర ప్రభుత్వం మరోసారి కోతపెట్టాలని నిర్ణయించింది. ప్రస్తుతం ఇస్తున్న రూ. 15 వేలల్లో ఇప్పటికే రూ. 1,000 కోత పెట్టిన ప్రభుత్వం.. మరో రూ. వెయ్యి కట్ చేయనున్నట్లు తెలుస్తోంది. దీంతో మొత్తంగా రూ. 2,000కు కోతపడనుంది. ఇప్పటికే మరుగుదొడ్ల నిర్వహణ పేరుతో రూ.వెయ్యి తగ్గించగా.. ఇప్పుడు పాఠశాల మౌలిక సదుపాయాల నిర్వహణకు మరో రూ. 1,000 మినహాయించేందుకు రాష్ట్ర సిద్ధమైంది.

ఈ పథకం కింద జూన్‌లో రూ. 13 వేలు మాత్రమే విద్యార్థుల తల్లుల బ్యాంకు ఖాతాల్లో జమ చేస్తారు. లబ్ధిదారుల నుంచి మినహాయించిన మొత్తాన్ని పాఠశాల విద్యా శాఖ ద్వారా పాఠశాలల నిర్వహణకు కేటాయిస్తారు. ఈ సమాచారాన్ని పాఠశాల విద్యాశాఖ ఉన్నతాధికారులు జిల్లా స్థాయి అధికారులకు చేరవేశారు.

అలాగే, అమ్మఒడి పథకం అందాలంటే ప్రభుత్వం మరిన్ని నిబంధనలు జోడించింది. నవంబర్ 8వ తేదీ నుంచి ఏప్రిల్‌ 30 వరకు విద్యార్థి హాజరు 75 శాతం ఉంటేనే అమ్మ ఒడి డబ్బు అందుతుంది. అమ్మ ఒడి పథకాన్ని 2021-22 ఆర్థిక సంవత్సరంలో అసలు అమలు చేయలేదు. గతేడాది జనవరి 11న ఈ పథకం కింద తల్లుల బ్యాంకు ఖాతాల్లో జమ చేయగా.. ఈ ఏడాది విద్యార్థుల హాజరు పేరుతో దీన్ని జూన్‌కు మార్చారు.