ఏపీలో మరో రెండు రోజులు కర్ఫ్యూ! స్వీయ నిర్బంధంలో సీఎం జగన్

ఏపీలో కరోనా వైరస్‌ (కోవిడ్ 19) పాజిటివ్ కేసులు ఐదుకు పెరిగిన నేపథ్యంలో రాష్ట్రంలో మరో రెండు రోజులు కర్ఫ్యూ కొనసాగించే అవకాశంపై ముఖ్యమంత్రి వైఎస్ జగన్మోహన్‌రెడ్డి అధికారులతో సమాలోచనలు జరిపారు. జనతా కర్ఫ్యూ, కరోనా వైరస్‌ నివారణ చర్యలపై తాడేపల్లిలోని క్యాంపు కార్యాలయంలో రాష్ట్ర వైద్య ఆరోగ్య శాఖ మంత్రి ఆళ్ల నాని, రాష్ట్ర ప్రభుత్వ ప్రధాన కార్యదర్శి (సీఎస్) నీలం సాహ్ని, డీజీపీ గౌతమ్ సవాంగ్‌ సహా ఉన్నతాధికారులతో సీఎం సమీక్ష నిర్వహించారు.

విదేశాల నుంచి రాష్ట్రానికి వచ్చే వారి పట్ల కేంద్రం నిర్దేశించిన నియమాలను పాటించాలని సీఎం జగన్‌ ఆదేశించారు. రాష్ట్రంలో నమోదైన పాజిటివ్‌ కేసులపై ఈ సమావేశంలో విస్తృతస్థాయిలో చర్చించారు. కరోనా అనుమానిత కేసులకు ఐసోలేషన్‌ వార్డులు, చికిత్స సదుపాయాలు, ఔషధాలపై ముందస్తు చర్యలు తీసుకోవాలని సీఎం ఆదేశించారు.

మరోవైపు జనతా కర్ఫ్యూ నేపథ్యంలో ముఖ్యమంత్రి వైఎస్ జగన్ ఆదివారం మొత్తం స్వీయ నిర్బంధంలో ఉన్నారు. ఇంట్లో ఉంటూనే రాష్ట్రంలో పరిస్థితులపై ఎప్పటికప్పుడు ఉన్నతాధికారులతో సమీక్షించారు. అలాగే రాష్ట్రంలో కరోనా పరిస్థితిపై ఈ సాయంత్రం 5 గంటలకు సీఎం జగన్‌ మీడియా సమావేశం నిర్వహించనున్నారు. కరోనా వైరస్‌ నియంత్రణకు ప్రభుత్వం చేపట్టిన చర్యలను ఆయన వివరించనున్నారు. ఈ సమావేశంలోనే కర్ఫ్యూ కొనసాగింపుపై సీఎం జగన్‌ ప్రకటన చేసే అవకాశముంది.